Respýblıkalyq tasjoldarda «KAJservıs» ShQOF JShS qardan arshyp álek. Olardyń 103 tehnıkasynyń 96 paıyzy kez kelgen ýaqytta jolǵa shyǵýǵa daıyn. Al, oblystyq baǵyttarda «OblShyǵysJol» JShS-niń 119 tehnıkasy tynymsyz qyzmet atqaryp jatyr. Aýdandyq joldar men aýyl kóshelerinde 584 tehnıka turǵyndardyń qaýipsiz qozǵalysyn qamtamasyz etken.
Boran kúsheıip, jaǵdaı kúrdelene qalsa, iske qosylatyn 185 birlik qosymsha tehnıka, sondaı-aq aýyr býldozerler men avtogreıderlerden quralǵan jedel jasaq bar. Jol ústinde qalǵan júrgizýshiler de nazardan tys qalmaıdy. Klımattyq jaǵdaıy qıyn aýmaqtarda jol paıdalaný pýnktteri men jylytý oryndary jumys istep tur. Munda jolaýshylar jylynyp, demalyp, qajetti kómek ala alady.
Qysqa daıyndyq aldyn ala bastalǵan. Joldarǵa kóktaıǵaqqa qarsy materıaldar sebilip, 100 tonna tehnıkalyq tuz, myńdaǵan sıgnaldyq baǵanalar men jol belgileri ázirlendi. Qar jıi basatyn jáne kóshkin qaýpi bar ýchaskelerde arnaıy qalqandar ornatylyp, aldyn alý jumystary júrgizildi.
«Bıyl qatty qar men kórinýdiń tómendeýine baılanysty joldar ýaqytsha jabylǵan sátter de boldy. Alaıda, barlyq jaǵdaı baqylaýda ustalyp, ortasha jabylý ýaqyty 10 saǵattan aspady, kóbine túngi mezgilde japtyq», dedi Jolaýshylar kóligi jáne avtomobıl joldary basqarmasy basshysynyń mindetin atqarýshy Ernar Maýlethanov.
Aıtqandaı, 1 qarashadan bastap oblys joldary táýlik boıy baqylaýda. Jol qyzmetteri, polısııa jáne tótenshe jaǵdaılar organdary birlesip, joldaǵy ahýaldy BAQ pen messendjerler arqyly halyqqa jedel jetkizip otyr.
Astanaǵa qalyń qar tústi: tazalaý jumystaryna 3 myń adam jumyldyryldy
