Foto: Mádenıet jáne aqparat mınıstrligi
«Táýelsizdik urpaqtary» granty Memleket basshysynyń bastamasymen daryndy ári bolashaǵynan úmit kúttiretin jastardy qoldaý maqsatynda 2021 jyly qurylǵan. Osy ýaqytqa deıin atalǵan grant 123 azamattyń ıdeıasyn iske asyrýǵa jáne damytýǵa múmkindik berdi.
Aıda Balaeva jastardy qoldaý memlekettik saıasattyń basym baǵyttarynyń biri ekenin atap ótti.
«Qyzylordada ótken Ulttyq quryltaıda Memleket basshysy el damýynyń aldaǵy baǵytyn aıqyndap, jańa kezeńniń strategııalyq mindetterin naqtylap berdi. Qazirgi qabyldanyp jatqan sheshimder men júzege asyp jatqan reformalar jastarǵa sapaly bilim alyp, óz áleýetin tolyq iske asyrýǵa, básekege qabiletti, sanaly azamat bolyp qalyptasýyna múmkindik beredi. Sondyqtan bul tarıhı kezeń – tek ózgerister ýaqyty ǵana emes, bolashaqqa degen senimdi nyǵaıtatyn, jańa múmkindikterge jol ashatyn mańyzdy dáýir dep aıtýǵa tolyq negiz bar», dedi vıse-mınıstr.
Mádenıet jáne aqparat mınıstrliginiń málimetinshe, bıyl «Táýelsizdik urpaqtary» baıqaýyna 6 baǵyt boıynsha 1700 ótinim kelip túsken, onyń 1622-si qabyldanǵan. Olardyń qatarynda Qazaqstannyń mádenı murasyn men ulttyq dástúrlerdi nasıhattaýǵa, mádenıet pen ónerdi damytýǵa, ǵylymı zertteýler júrgizýge, IT jáne volonterlik saladaǵy startaptarǵa, sondaı-aq kreatıvti bıznes-ıdeıalarǵa baǵyttalǵan jobalar bar.
