Foto: Massaget.kz / Nurjan Rysbekov
Vıse-mınıstr sý aıdyndaryna aerovızýaldy monıtorıng júrgizip, ıdrologııalyq jaǵdaıdy jáne bıik taýly morenalyq kólderdiń, sel ýchaskeleriniń jaı-kúıin baqylady.
Sondaı-aq Kegen Tursynbaev Altaı, Úlken-Naryn, Katonqaraǵaı jáne Shemonaıha aýdandaryndaǵy sý tasqyny qaýpi bar ýchaskelerine arnaıy baryp, aýdandarda sý tasyqynynyń aldyn alý boıynsha atqarylǵan ınjenerlik jumystarmen tanysty.
Oblystyq Tótenshe jaǵdaılar departamenti bastyǵy Rashıd Bilálovtyń aıtýynsha, óńirde qorǵanys bógetterin jóndeý, sý burý arnalaryn tazartý jáne tereńdetý, tasjoldarda kópirler salý jáne jóndeý baǵytynda 28 ınjenerlik is-shara oryndalǵan.
«Sý tasqynyna qarsy is-sharalar ýaqytyly jáne úılesimdi jumysty talap etedi. Basty mindet – halyq pen ınfraqurylym úshin táýekelderdi barynsha azaıtý. Barlyq qajetti ınjenerlik qurylys yqtımal sý tasqynyna, al shuǵyl qyzmetterdiń máselege jedel den qoıýǵa daıyn bolýy tıis. Biz jaǵdaıǵa monıtorıng júrgizip, jergilikti aýmaqta is-qımyldy úılestiremiz», dedi vıse-mınıstr Kegen Tursynbaev.
Aıta keteıik, «ShQO ákiminiń Ahýaldyq ortalyǵy» aqparattyq júıesinde sý tasqyny jaǵdaıyn monıtorıngteýdiń biryńǵaı kesheni jumys isteıdi. Júıe 49 gıdropostar boıynsha aldyn ala 7 kúndik boljam jasaı alady.
Buǵan deıin sý tasqynynyń aldyn alý maqsatynda Túrkistan oblysynda da ózen arnalary tazartylyp jatqanyn habarlaǵanbyz.
Sondaı-aq Jetisýda da sý tasqynynyń aldyn alý jumystary qarqyn aldy.
