Jóndeý jumysymen qatar taǵylym ordasyndaǵy birqatar ekspozısııa tolyǵa túsken. Kórermenge burynnan tanys otandyq jáne álemdik óner jaýharlarymen birge jańa bólimder usynyldy. Atap aıtsaq, grafık-sýretshi Evgenıı Sıdorkınniń shyǵarmalar kórmesi, «Qazaq ónerindegi áıel beınesi» ekspozısııasy, elimizdiń táýelsizdik kezeńindegi óner bólimi, sondaı-aq HH ǵasyrdyń sońy – HHI ǵasyrdyń basyndaǵy sheteldik ónerdiń jańa týyndylaryna arnalǵan bólim bar. Nátıjesinde, eldegi basty kórkem galereıa zamanaýı halyqaralyq standarttarǵa saı, halyqaralyq deńgeıdegi kórme jobalaryn iske asyrýǵa tolyq daıyn ekeni aıtyldy.
О́ner ordasynyń qaıta ashylýy mýzeıdiń 90 jyldyǵy men 1976 jyldan beri ornalasqan ǵımarattyń 50 jyldyǵymen tuspa-tus kelip otyr. Jańǵyrtý jobasy Mádenıet jáne aqparat mınıstrliginiń bastamasymen júzege asqan.
«Mýzeı kelýshilerdi jańartylǵan keńistikte tyń ekspozısııalarymen qarsy alady. Zaldardyń jańa tústik sheshimi burynnan tanys eksponattardy jańa qyrynan qabyldaýǵa múmkindik bermek. Aldaǵy ýaqytta da túrli jobalar men kórmelerdi, mádenı is-sharalardy uıymdastyryp, shabyt syılap, dıalog pen shyǵarmashylyqqa arnalǵan ortalyq retindegi qyzmetimizdi jalǵastyratyn bolamyz», deıdi Á.Qasteev mýzeıiniń baspasóz qyzmeti.
Tarıhy tereńde jatqan taǵylym ordasy táýelsizdik jyldarynda sapaly damý kezeńine aıaq basty. Beıneleý óneri salasyndaǵy jetekshi ǵylymı-zertteý jáne mádenı-aǵartý ortalyǵy retinde eldegi eń baǵaly úzdik kórkemóner toptamasyna ıe. Onyń biregeı kolleksııasynda 26 myńnan astam eksponat bar. Mýzeıde beıneleý óneri sheberleriniń shyǵarmashylyq murasymen qatar, el mádenıeti men tarıhyndaǵy eń mańyzdy kezeńder aıshyqtalǵan.
Munda qazaq sýret óneriniń negizin qalaýshy Ábilhan Qasteevtiń qazirgi zamanǵy shyǵarmalary men otandyq óner klassıkteri Qanafııa Teljanov pen Aısha Ǵalymbaevanyń, Gúlfaırýs Ismaılova men Evgenıı Sıdorkınniń, Salıhıtdın Aıtbaev pen Sabyr Mámbeevtiń, Janataı Shárdenov pen Sergeı Kalmykovtyń biregeı qoltańbasy saqtalǵan. Otandyq keskindemeden ózge orys jáne Batys Eýropa keskindemeleriniń biregeı týyndylaryn, Shyǵys elderiniń óneri men qoldanbaly sándik sheberliktiń úzdik úlgilerin mýzeı tórinde tur.
Turaqty ekspozısııalar zamanaýı talaptarǵa saı jabdyqtalyp, ýaqyt bederine saı sıfrlyq sheshimder de kórinis taba bastaǵan. Ekspozısııalarǵa tikeleı jaryq berý, mamandandyrylǵan aspaly jabdyqtaý, mýltı-eksplıkasııalardy ornatý jáne QR-aqparattyq súıemeldeý syndy zamanaýı tehnologııalar dástúr men ınnovasııalardyń úılesimimen qoıyldy.
ALMATY
