Ortalyq kommýnıkasııalar qyzmetinde Investısııalar jáne damý vıse-mınıstri Albert Raý men mınıstrliktiń Indýstrııalyq damý jáne óndiris qaýipsizdigi komıtetiniń tóraǵasy Amanııaz Erjanov baspasóz máslıhatyn ótkizip, otandyq ónim óndirýshilerdi memleket tarapynan qoldaýdyń bıylǵy jylǵy jospary jóninde áńgimeledi.
Vıse-mınıstrdiń sózine qaraǵanda, aǵymdaǵy jyldyń birinshi toqsanyn otandyq ónim shyǵarýshylar jaqsy tabyspen qorytyndylaǵan. Árıne, kórshi Reseı eliniń rýbli eki esege deıin qunsyzdanǵanda elimizdiń birqatar kásiporyndary úlken qıyndyqtarǵa tap kelgen. Dese de, jalpy óndirilgen ónim kólemine qarap jaǵdaıdyń tolyq qanaǵattanarlyq ekenine kóz jetkizýge bolady. Elimizdiń metall óndirýshileri de burynǵy qarqynyn báseńdete qoımapty. Sondaı-aq, temirden túrli zat óndirýshi kásiporyndar da ónimin kóbeıtpese azaıtpaǵan. Onyń dáleli retinde spıker armatýra jasaýshy zaýytty mysalǵa keltirdi. Naqty aqparatqa júginsek, búginde armatýra men jol salýǵa paıdalanylatyn bıtým ónimin shyǵarý eselep artqan. Demek, bul ónimderge suranys bar. Osyny aıtqan vıse-mınıstr, bıylǵy jyldyń birinshi toqsanyndaǵy ósim sandaryna toqtaldy. «О́nim shyǵarý – 0,6, taý-ken ónimderin óndirý – 1,1, ónimdi qaıta óńdeý 0,5 paıyzǵa ósti», dedi A.Raý. Áıtse de, álemdik ekonomıkalyq daǵdarys pen Reseıdegi qalyptasqan ahýalǵa oraı áli de jaǵdaıy durystala almaı turǵan kásiporyndar bar eken. Atap aıtqanda, mashına qurastyrý salasynda 28,7 paıyzǵa deıin keri ketýshilik baıqalady. Osyny jetkizgen vıse-mınıstr, salany qoldap-qýattaý úshin el Úkimeti birqatar sharalardy qarastyryp jatqanyn aıtty. Sóıtip, saladaǵy alda bolar qıyndyqtardy da jasyrmady. «Aqshasy qunsyzdanǵan Reseıden ákelingen arzan avtokólikterdiń ornyn toltyrý bıylǵy jyly da ońaı bolmaıdy. Desem de, shyndyqqa týra qarap aıtarym, bıylǵy jyly 30 myń otandyq avtokólik jasap shyǵaratynymyzdy ashyq málimdegim keledi. Taza qıyn soǵyp jatsa, 20 myń kólik qurastyratynymyz anyq», dedi vıse-mınıstr. Onyń sózine qaraǵanda, qıyndyqqa tap bolǵan otandyq ónim shyǵarýshylardy qoldaý isi jalǵasyn taba beredi. Bıylǵy jyldyń ózinde kásiporyndardy demeý maqsatynda 100-den astam túrli sharalar qaralyp, salanyń saýyǵyp ketýine atsalysqan. Nátıjesinde 200-ge jýyq kásiporynǵa naqty qoldaý kórsetilgen. Birer kúnde Keden odaǵyna qosylǵaly turǵan kórshi Qyrǵyz eli jóninde áńgime órbidi. Spıkerdiń sózine qulaq assaq, Keden odaǵynyń Tehnıkalyq reglamentiniń talaptary kórshi elden eski avtokólikterdi jetkizýge tosqaýyl bolady eken. «Qyrǵyzstannan avtokólikterdi alyp kelý bul eldiń Eýrazııalyq ekonomıkalyq odaqqa kirýi aldynda talqylanǵan daýly máselelerdiń biri boldy. Iаǵnı, qyrǵyzdar ózderiniń avtoónerkásibi joq bolǵandyqtan, kez kelgen ákelim baj salyǵyn on jylǵa keıinge qaldyrýdy surady. Sonymen, olarǵa 2014 jyldyń 1 qańtarynan bastap kirgen avtokólikterdiń barlyǵy bizdiń elge nemese Reseıge kiretin bolsa, onda ol kólikterge Keden odaǵyndaǵy avtokólikterge arnalǵan baj salyǵyn salý týraly kelisim jasaldy. Biraq, sońǵy jyldary Qyrǵyzstanǵa 100 myńǵa jýyq kólik ákelingenin esepke alsaq, ol avtokólikterdiń keri eksporttalýyn kútip otyrǵandar bar deýge bolady. Sol sebepti, Qazaqstanǵa ákelinetin avtokólikter Keden odaǵy Tehnıkalyq reglamentiniń talaptaryna saı bolýy kerek. Bul qıyn sharýa emes. Eń aldymen, bul qaýipsizdik tehnıkasyna baılanysty. Mysaly, tejegishti avtomatty buǵattaý, qaýipsizdik jastyqshalary, balalarǵa arnalǵan oryndyqtardy bekitý oryndary, kúndiz qosýǵa arnalǵan shamdar bolýy kerek. Bul óz kezeginde, eski kólikterdiń elge ákelinýine tosqaýyl bolady degen oıdamyz», dedi vıse-mınıstr.
Nurbaı ELMURATOV, «Egemen Qazaqstan».
Sýret:kostanaytany.kz
