Jaqsylyq jasaý – jaýapkershilik

Qoǵamnyń kemeldenýi, izgi­lik­tiń saltanat qurýy eń aldymen azamattardyń áleýmettik jaýapkershiligine baılanysty ǵoı. Osy jaýapkershilikti jasta­ıynan sezinip, eriktilik qyzmetti qaǵıdatyna aınaldyrǵan jastardyń qatary kún ótken sa­ıyn kóbeıip keledi. Biz tanys­tyr­ǵaly otyrǵan belsendi Janel Amanjolqyzy – Qaraǵandy ob­lys­tyq «VolteQ» volonterlik kor­pý­syn­daǵy jetekshi jastardyń biri.

Janel 18 jasta. Qazirgi tańda ol «Shet tilder kolledji» peda­go­gıkalyq fakýltetiniń 4-kýrs stýdenti. Jas bolsa da, vo­lon­­terlik qyzmetpen úsh jyldan beri turaqty aınalysyp júr.

Eriktilikke naqty qadamy 2023 jyly Qaraǵandy oblystyq «VolteQ» volonterlik korpýsyna qosylǵan sátten bastalady. Dál osy ortada ol volonterliktiń jú­ıeli, josparly ári nátıjege baǵyt­talǵan qyzmet ekenin túsi­nedi. Zoovolonterlikpen qatar áleýmettik, ekologııalyq, mádenı jáne ıventtik baǵyttardaǵy joba­­larǵa aralasa júrip, erikti bolý­dyń qoǵamdy ózgertýdegi naqty qural ekenin uǵyndy.

2017 jyldan beri jumys istep kele jatqan «VolteQ» korpýsy búginde oblystaǵy volonterlik qozǵalystyń mańyzdy tiregine aınalǵan. Korpýs oblystyq Jas­tar resýrstyq ortalyǵynyń qol­daýymen jumys istep, erik­ti­ler­ge uıymdastyrýshylyq, motı­va­sııa­lyq jáne yntalandyrý baǵy­tyn­da jan-jaqty kómek kórsetedi. Munda ár volonterdiń eńbegi eske­ri­lip, bas­tamalary qoldaý tabady.

Janel qatysyp júrgen negiz­gi jobalardyń qatarynda qart­tarǵa qamqorlyq kórsetýge baǵyt­tal­ǵan «Jas Qaria», janýarlar panajaılaryna kómek beretin «Tirshilik Ieleri», sondaı-aq emde­lý­ge muqtaj jandarǵa qarjy jı­naýdy kózdeıtin «JarmenQ» qaıy­rymdylyq jobasy bar. Bul bastamalardyń barlyǵy qoǵam­daǵy naqty áleýmettik máse­le­lerge baǵyt­­talǵanymen qundy.

Erekshe atap óterligi – korpýs volonterleriniń avtorlyq jobalary da granttyq qoldaýǵa ıe bolyp otyr. Tabıǵatty qorǵaýǵa baǵyttalǵan «Sayahattime» jobasy ekologııalyq mádenıetti qalyptastyrýǵa úles qossa, «Bilim Bus» jobasy shalǵaı eldi meken­­­der­degi balalardyń bilim alý múm­kin­digin keńeıtýde. Bul joba­lar aıasynda qarjylyq saýat­ty­lyq, jasandy ıntellektini paıdalaný jáne bazalyq bilim berý baǵyttary qamtylǵan.

Byltyrǵy jyl Janel úshin kási­bı ári tulǵalyq turǵydan mańyz­dy kezeń boldy. Ol volon­ter­­lik qyzmet boıynsha trener atanyp, Azamattyq bastamalar­dy qoldaý ortalyǵynyń bir mıl­lıon teńge kólemindegi grantyn jeńip aldy. Sonymen qosa, jan­ýar­lar­ǵa janashyrlyq kóz­qa­ras qa­lyptastyratyn áńgime­le­rin kitap etip shyǵardy.

Eńbegi eskerýsiz emes. Janel «Jyl volonteri – 2025» halyq­ara­lyq syılyǵynyń «Jan­ýar­­lardy qorǵaý máselelerin sheshýge qosqan úlesi úshin» atalymy boıynsha laýrea­ty atandy.

Qazir «JarmenQ» jobasy aıasyn­­da Qaraǵandy qalasynda qaıy­­­rym­­­dylyq kerýen-jár­meń­kesi uıym­­­dastyrylyp jatyr. Jany izgi Janel sol shar­ýa­nyń basy-qasynda júr. Igi is-shara S.Sápıev atyndaǵy boks orta­ly­ǵyn­da ótip, jınalǵan qarajat Arlan Túrkenov esimdi pasıenttiń emine jumsalady.

«Janel áriptesimiz «VolteQ» volonterlik korpýsyna kelgen kúnnen bastap-aq belsendiligimen jáne jaýapkershiligimen kózge tústi. Túrli is-sharada ózin kásibı qyrynan tanytyp, qundy tájirıbe jınaqtady. Respýblıkalyq baıqaý sheńberinde uıymdastyrylǵan Zerendi volonterlerdi oqytý lagerinen ótip, Ulttyq volonterlik jeli ótkizgen trenerlik oqýdy sátti aıaqtady. Búginde spıkerlik qabiletterin odan ári damytyp, jańa belesterdi baǵyndyryp júr. Jan-janýarlarǵa arnalǵan kitaby jaryq kórip, kez kelgen jobany joǵary deńgeıde júzege asyra alatyn, eriktilerdi bir maqsatqa biriktire biletin kóshbasshy retinde oblysymyzdyń volonterlik qoz­ǵalysyna súbeli úles qosyp keledi. Osy eńbegi elenip, «VolteQ» volon­­ter­lik korpýsynyń jetekshisi qyz­metine taǵaıyndaldy», deıdi Qaraǵandy oblysynyń volonter­ler front-ofısiniń basshysy Ardana Myrzanova.

Janeldiń paıym-parasaty «jaýapkershilik pen janashyrlyq adamdy da, qoǵamdy da ózgertedi», deıdi. Olaı bolsa, jaqsy iske ju­my­la ketetin judyryqtaı qyz­­dyń ár bastamasyna sáttilik tileımiz.

Qaraǵandy oblysy