Foto: Aqtóbe oblysynyń ekologııa departamenti
«QazaqGaz Aimaq» kompanııasynyń Aqtóbe oblystyq fılıaly qalaǵa jetkizilip jatqan gazdyń barlyq talaptar men standarttarǵa saı ekenin málimdedi. Mekeme ókilderiniń aıtýynsha, gazdyń aǵýy nemese jospardan tys shyǵarylýy tirkelmegen.
Máselege baılanysty ekologııa mamandary da tekserý jumystaryn júrgizgen. Ekologııa departamentiniń málimdeýinshe, 27-28 qańtar kúnderi departament mamandary qala aýmaǵynda atmosferalyq aýanyń sapasyn anyqtaý maqsatynda reıdtik is-sharalar ótkizdi. Júrgizilgen ólsheýlerdiń nátıjesinde lastaýshy zattardyń (kúkirtsýtek, azot dıoksıdi, kúkirt dıoksıdi, kómirtek oksıdi, merkaptandar) shekti ruqsat etilgen konsentrasııasynan asyp ketý deregi anyqtalmaǵan.
Qazirgi ýaqytta ekologtar «QazaqGaz Aimaq» mamandarymen birlesip, aýa sapasyna qatysty qosymsha ólsheýlerdi jalǵastyryp jatyr. Mamandar turǵyndar tarapynan túsken árbir sıgnal nazarǵa alynatynyn aıtady.
Aıta keteıik, Aqtóbe turǵyndary jaǵymsyz ıiske qatysty máseleni birneshe jyldan beri kóterip keledi. Ásirese jaz aılarynda bul ıis qalanyń basym bóliginde seziletini jıi aıtylady. 2025 jyly oblystyq ekologııa departamenti ıistiń kózi anyqtalǵanyn habarlap, onyń aýyl sharýashylyǵy maqsatynda organıkalyq tyńaıtqysh retinde paıdalanylǵan qus sańǵyryǵynan shyqqanyn málimdegen edi. Alaıda bul jolǵy jaǵdaıdyń sebebi basqa bolýy múmkin degen boljam bar.
Aqtóbe oblysynda eldi mekenderdi gazdandyrý jobasy artyǵymen oryndaldy
