Senat tóraǵasy Máýlen Áshimbaev moderatorlyq etken podkastqa Ǵylym jáne joǵary bilim mınıstri Saıasat Nurbek, Narxoz Business School dekany Gúlnár Kúreńkeeva jáne Nazarbayev University professory Dórbethan Suraǵan qatysty.
Ata zańǵa strategııalyq baǵdar: Ǵylymı erkindik Konstıtýsııa deńgeıinde bekitilýi múmkin
Máýlen Áshimbaev Memleket basshysy ǵylym jáne joǵary bilim salasyn damytý memlekettiń mańyzdy strategııalyq basymdyqtarynyń biri retinde aıqyndap bergenin atap ótti. Onyń aıtýynsha, Prezıdent bastamalary júıeli reformalar arqyly ǵylymnyń sapasyn arttyrýǵa, ýnıversıtetterdiń áleýetin kúsheıtýge jáne ǵylymı nátıjelerdi naqty ekonomıkalyq ósimge baǵyttaýǵa negizdelgen.
«Memleket basshysy Qasym-Jomart Toqaevtyń tapsyrmasymen keıingi jyldarda ǵylym jáne joǵary bilim salasynda júıeli jumys atqarylyp jatyr. Prezıdent janynan Ǵylym jáne tehnologııalar jónindegi ulttyq keńes quryldy. Ulttyq ǵylym akademııasynyń mártebesi kúsheıtildi. Ǵylym týraly zańnamaǵa aýqymdy ózgerister engizilip, «Ǵylym jáne tehnologııalyq saıasat týraly» jańa zań qabyldandy. Ǵalymdardy qosymsha qoldaý tetikteri qalyptasyp, salany qarjylandyrý kólemi de edáýir artty. Osyndaı naqty qadamdar el ǵylymy men joǵary biliminiń básekege qabilettiligin arttyrýǵa oń septigin tıgizedi dep senemiz», dedi M.Áshimbaev.
Sonymen qatar qatysýshylar bólingen qarajattyń tıimdi jumsalýy, ǵylym nátıjelerin kommersııalandyrý, qoldanbaly zertteýlerdi kúsheıtý asa mańyzdy ekenin atap ótti. Podkastta jasandy ıntellektiniń ǵylym jáne joǵary bilim júıesine yqpaly, ony zertteý men oqytý prosesine engizý, ýnıversıtetterdi ınnovasııalyq ortalyqtarǵa aınaldyrý máseleleri de talqylandy. M.Áshimbaev bul baǵytta adam kapıtaly aıryqsha mańyzǵa ıe ekenin aıtty.
«Biz tehnologııalyq serpilis dáýirinde ómir súrip jatyrmyz. Jasandy ıntellekt pen jańa tehnologııalardy tıimdi paıdalaný úshin, eń aldymen, júıeli jáne synı oılaı alatyn kúshti kadrlar daıyndaýymyz qajet. Ǵylym tek akademııalyq ortaǵa ǵana emes, ekonomıkanyń naqty sektorlaryn damytýǵa da yqpal etýi kerek. Memleket basshysy atap ótkendeı, ǵylymı áleýet el damýyna qyzmet etetin naqty nátıjege baǵyttalýǵa tıis», dedi Senat tóraǵasy.
Budan basqa, qatysýshylar joǵary bilim júıesin odan ári jańǵyrtý, ýnıversıtetterdiń akademııalyq erkindigin arttyrý, ǵylym men bıznes arasyndaǵy baılanysty nyǵaıtý jáne halyqaralyq tájirıbege mán berý baǵytyndaǵy basymdyqtarǵa toqtaldy.
Aıta keteıik, Taldau Talks – ashyq dıalogqa arnalǵan podkast-platforma. Onda el damýynyń ózekti máseleleri men Memleket basshysy júktegen mindetterdi iske asyrý tetikteri talqylanady.
Podkasttyń tolyq nusqasyn Taldau Talks-tyń resmı YouTube-arnasynan kórýge bolady.
