Sýretti túsirgen – Erlan OMAR, «EQ»
О́tken aptada qoǵamdy eleń etkizgen oqıǵa da kóptiń esinde. Pavlodar qalasynyń 39 jastaǵy turǵyny ınsýltten kóz jumǵannan keıin, onyń jubaıy marqumnyń aǵzalaryn transplantasııalaýǵa kelisken. Ota elordadan kelgen mamandar tobynyń qatysýymen jasalǵan. Bir mezette júrek, eki búırek, baýyr jáne kózdiń qasań qabyqtary muqtaj jandarǵa salyndy. Qazir pasıentterdiń jaǵdaıy turaqty, dárigerlerdiń baqylaýynda, ýaqtyly em alyp jatyr.
Aıta keterligi, qasań qabyqty kóshirý operasııasy Pavlodarda alǵash ret jasalǵan. Buǵan deıin mundaı operasııalar tek Astana men Almaty qalalaryndaǵy ǵylymı ortalyqtar deńgeıinde jasalatyn.
Respýblıkalyq transplantologııa jáne joǵary tehnologııalyq medısınalyq qyzmetterdi úılestirý ortalyǵynyń dırektory Aıdar Sıtqazınovtyń aıtýynsha, búırek, baýyr aýrýlary jıilep otyr. Baýyr boıynsha – gepatıtter, sırroz, fıbrozdar bar. Júrekke qatysty da buryn ótkerilgen ınfeksııalyq syrqattar júrek-qan tamyr júıesine asqyný beredi. Osyndaı jaǵdaılarda naýqastar úshin jalǵyz múmkindik – transplantasııa, ıaǵnı aǵza almastyrý.
Qazir kútý paraǵynda, balalardy qosa alǵanda, 4 500-den astam pasıent tur. Olardyń basym bóliginde búırek qyzmeti toqtaǵan. Qaza bolǵannan keıin donor bola alatyn jandardyń jasy 18 ben 65 aralyǵynda. Dárigerlerdiń aıtýynsha, aǵzalardy alý tek marqumnyń ózi tiri kezinde bergen kelisimi men týystarynyń ruqsaty bolǵan jaǵdaıda ǵana júzege asady. Al eger adam ómirinde óz organdaryn paıdalanýǵa resmı túrde tyıym salsa, bul sheshimdi eshkim ózgerte almaıdy.
Aqpan qan tapsyrý aıy dep jarııalandy: Aqmaral Álnazarova qan donory boldy
