Mańyzdy ǵylymı jıynǵa elimizdiń túkpir-túkpirinen belgili ádebıettanýshy ǵalymdar, jas zertteýshiler, joǵary oqý oryndarynyń oqytýshylary men magıstranttar qatysyp, Muqaǵalı Maqataevtyń baı ádebı murasyn qazirgi ádebıettaný ǵylymynyń tyń baǵyttary turǵysynan zerdeledi. Konferensııa barysynda aqyn shyǵarmashylyǵyna qatysty mazmundy baıandamalar jasalyp, jańa ǵylymı tujyrymdar ortaǵa salyndy.
Ǵalymdar óz sózinde Muqaǵalı poezııasynyń kórkemdik álemine, tildik órnegine, obraz jasaý sheberligine keńinen toqtaldy. Sondaı-aq aqyn jyrlaryndaǵy rýhanı-fılosofııalyq tereńdik, adam janynyń ıirimderin dál beıneleý, ulttyq bolmys pen jalpyadamzattyq qundylyqtardyń sabaqtastyǵy, Muqaǵalı murasynyń urpaqqa berer taǵylymy jan-jaqty saralandy.
«Muqaǵalıdaı keńinen nasıhattalǵan aqyn joq deýge bolady. Buǵan byltyr jaryq kórgenine 20 jyl tolǵan «Muqaǵalı» jýrnaly men bıyl qurylǵanyna 20 jyl tolyp otyrǵan Muqaǵalı Maqataev atyndaǵy halyqaralyq qoǵamdyq qordyń nátıjeli jumysy dálel. Aqynnyń uly Juldyz – áke murasynyń shynaıy shyraqshysy, al Baqytgúl jeńgemizdeı atasyn ardaqtaǵan kelin sırek. Bul – aqyndy qurmetteý, poezııany, ádebıetti súıý degen sóz. Muqaǵalı shyǵarmalary qansha tilge aýdarylsa da, ısi qazaqqa eń jaqyn aqyn bolyp qala beredi. Onyń ulylyǵy – qarapaıym on bir býyndy qara óleńmen oqyrman júregin jaýlaı bilýinde. Maǵjan Jumabaev, Sáken Seıfýllın, Qasym Amanjolov syndy uly aqyndardaı 45 jyl ǵana ǵumyr keshse de, Muqaǵalı aqynnyń rýhanı ómiri myńjyldyqtarǵa jalǵasa beretinine senemiz», deıdi Jazýshylar odaǵy tóraǵasynyń orynbasary Ǵalym Qalıbekuly.
Ár jyly aqpan aıynda, aqyn týǵan kún jyr merekesi sekildi ózdiginen atalyp ótedi. Bul – ózi óleńge, óleńi ómirge aınalǵan tańǵajaıyp talant ıesiniń halyq júreginen máńgilik oryn alǵanyn kórsetedi. Konferensııaǵa qatysqan zııaly qaýym aqyn shyǵarmashylyǵyn aıshyqtaýǵa arnalǵan ıgi jobalar mereıli jyl aıasynda jalǵasyn tabatynyn jetkizdi.
«О́mirin óleńmen órgen Muqaǵalı murasy – jyr súıer qaýym úshin máńgilik taýsylmaıtyn taqyryp. Bıyl alyp aqyndy jyr besikke bólegen Raıymbek aýdanynyń qurylǵanyna 90 jyl tolyp otyr. Osy mereıli beles aıasynda Muqaǵalı shyǵarmashylyǵy keńinen nasıhattalyp, túrli deńgeıdegi is-sharalar ótetin bolady. Jyl saıyn dástúrli túrde aqynnyń týǵan kúni ózi dúnıege kelgen qasıetti Qarasaz aýylynda bastaý alyp, tutas qazaq dalasyn sharlaıdy. Bıyl da oblystyq, respýblıkalyq deńgeıdegi rýhanı is-sharalar uıymdastyrylyp, aqyn murasy taǵy bir márte tórge ozbaq. Eń bastysy, munyń bárine aqyn týǵan aspantaýlyq aǵaıyn erekshe yqylas tanytyp otyr. Muqaǵalı Maqataevtyń týǵan kúnin jerlesteri jyl saıyn zor qýanyshpen, erekshe saǵynyshpen kútedi», deıdi Raıymbek aýdany ákiminiń orynbasary Ǵalym Jýsanbaev.
Konferensııa aıasynda Ulttyq kitaphana qory negizinde «Qazaq jyrynyń Han táńiri» atty kitap kórmesi uıymdastyrylyp, «Atamura» baspasynan jaryq kórgen «Han Táńiri» kitabynyń tusaýy kesildi.
Aıshyqty basqosý Respýblıka saraıynda jyl saıyn ótetin ádebı-sazdy keshke ulasyp, Roza Rymbaeva, Maqpal Júnisova, Ramazan Stamǵazıev, Tolqyn Zabırova, Aıjan Nurmaǵambetova, Medeý Arynbaev, Qanat pen Aıtkúl Qudaıbergenovter, Mádına Sádýaqasova, Beıbit Qorǵan, Shábá Ádenqul, Lálá Baqytnurqyzy, Saıa Mahambet bastaǵan óner sańlaqtary Muqaǵalı óleńderine jazylǵan ánderdi tamyljyta shyrqady.
ALMATY
