Foto: Ashyq derekkóz
Resmı derekterge sáıkes, 2025 jyly shetelge 76 mln tonna munaı shyǵarylyp, onyń jalpy quny 39,88 mlrd dollardy qurady. Salystyrmaly túrde 2024 jyly eksport kólemi 71 mln tonnany qurap, 42,3 mlrd dollar tabys túsken edi. Osylaısha eksport kólemi artqanymen, álemdik baǵanyń qubylýyna baılanysty jalpy túsim azdap tómendegen. Búginde munaı Qazaqstannyń barlyq eksporttyq kirisiniń 51 %-yn quraıdy.
Energy Monitor arnasynyń málimetinshe, eksporttalǵan munaıdyń ortasha baǵasy tonnasyna 525 dollar deńgeıinde qalyptasty. Eń joǵary baǵa Bagam araldaryna jóneltilgen munaıda tirkelip, tonnasyna 575 dollardy qurasa, eń tómengi kórsetkish О́zbekstan baǵyty boıynsha – 369 dollar boldy.
Statıstıkada Italııa otandyq munaıdyń negizgi baǵyttarynyń biri retinde kórsetilgenimen, bul el kóbine alǵashqy tirkeý núktesi retinde ǵana esepke alynady. Tankerler munaıdy Italııanyń Trıest portyna jetkizip, odan ári TAL munaı qubyry arqyly Avstrııa, Germanııa, Chehııa naryqtaryna jóneltedi. Osy turǵydan alǵanda, Qazaqstan munaıynyń eń iri tutynýshysy – Germanııa.
Eksporttyq baǵa negizinen «Urals Med» nemese «Brent Dtd» belgilenimi boıynsha esepteledi. Degenmen bıýdjetke tólenetin kedendik bajdar men salyqtar kóbine naqty satý baǵasynan joǵary deńgeıde qalyptasady. Sebebi esepteý kezinde treıderler usynatyn jeńildikter men otandyq munaıǵa beriletin dıskonttar eskerilmeıdi.
Abzal Narymbetov: Munaı eksporttaıtyn balama baǵyttardy damytpaǵanymyz tarıhı qatelik boldy
