«BB Nura» ortalyǵy oblys turǵyndaryna nefrologııalyq kómektiń tolyq sıklin kórsetedi. Munda táýlik boıy jumys isteıtin 24 tósektik stasıonar, 40 oryndyq ambýlatorııalyq dıalız bólimi, sondaı-aq eresekter men balalarǵa arnalǵan konsýltasııalyq-dıagnostıkalyq qyzmetter qarastyrylǵan. Ortalyq sozylmaly búırek aýrýyna shaldyqqan pasıentterge táýlik boıy, kúndizgi stasıonar jaǵdaıynda keshendi medısınalyq kómek kórsetedi.
«Ortalyq búırek aýrýyna shaldyqqan naýqastarǵa óte yńǵaıly. Olar osynda nefrologtiń konsýltasııasyn alyp, qajet bolǵan jaǵdaıda táýliktik stasıonarǵa jatyp, em qabyldaıdy. Qazir Abaı oblysynda 137 adam búırek almastyrý emin alyp jatyr. Onyń ishinde 100 adam Semeıde emdelýde. Aýrýdyń aldyn alýǵa bar kúsh-jigerimizdi jumsaımyz», deıdi nefrologııalyq ortalyqtyń óńirlik dırektory Indıra Ázimbaeva.
Aıagóz, Úrjar aýdandarynda ortalyqtyń bólimsheleri jumys isteıdi. Jaqyn arada Borodýlıha aýdanynda taǵy bir fılıaly ashylmaqshy.
Oblys ákimi Berik Ýálı Semeı qalasyndaǵy «BB Nura» nefrologııalyq ortalyǵyna arnaıy baryp, medısınalyq mekemeniń qyzmetimen tanysty, dárigerlermen sóılesti.
«Oblysymyzda medısınalyq nysandardyń sany kóbeıip keledi. «Aýyldyq densaýlyq saqtaýdy jańǵyrtý» ulttyq jobasy aıasynda óńirde 60-tan astam alǵashqy medısınalyq-sanıtarlyq kómek nysany salyndy. Solardyń qataryn «BB Nura» nefrologııalyq ortalyǵy tolyqtyryp otyr. Medısınalyq mekeme zamanaýı talaptarǵa saı salynǵan. Sońǵy úlgidegi dıagnostıkalyq, emdeý quraldary qoldanylady, bul turǵyndarǵa sapaly, tıimdi qyzmet kórsetýge múmkindik beredi. Osyndaı ortalyqtardyń iske qosylýy óńirdegi densaýlyq saqtaý júıesin nyǵaıtyp, adamdardyń ómir sapasyn jaqsartýǵa septigin tıgizedi. Bul baǵyttaǵy jumys aldaǵy ýaqytta da jalǵasyn tabady», dedi oblys ákimi.
Ákim málim etkendeı, Memleket basshysynyń tapsyrmasyna sáıkes Semeıde 300 oryndyq oblystyq kópsalaly klınıkalyq aýrýhana salýǵa jobalyq-smetalyq qujattama ázirlenip jatyr. Oblysta densaýlyq saqtaý salasynyń ınfraqurylymyn nyǵaıtý baǵytynda júıeli jumys júrgizilip keledi. Arnaıy memlekettik qordan bólingen qarajat esebinen Semeı qalasynda 100 oryndyq psıhonevrologııalyq medısınalyq-áleýmettik mekeme qurylysy aıaqtaldy. Úrjar aýdanynda teri koronarlyq aralasý ortalyǵyna qosymsha ǵımarattyń, Aıagóz aýdanynda magnıtti-rezonanstyq tomografqa arnalǵan ǵımarattyń qurylysy júrgizilip jatyr. Byltyr ana men bala densaýlyǵyn qoldaý maqsatynda «Salamatty ana» pansıonaty ashyldy.
Abaı oblysy
