Foto: ashyq derekkóz
Jol kartasyna eki salalyq vedomstvo – О́nerkásip jáne qurylys mınıstrligi men Jasandy ıntellekt jáne sıfrlyq damý baǵytyna jaýapty qurylymdar 11 iri kásiporynda júzege asatyn 41 jobany engizgen. Olardyń qatarynda Qarmet, «Altynalmas» AQ, «SaryarkaAvtoProm», «Qazaqmys» korporasııasy, «Qazfosfat», «Qazsınk», Solidcore Eurasia, «Qaınar-AKB», Astana Motors Manufacturing Kazakhstan, Eýrazııalyq top (ERG) jáne KAZ Minerals toby bar. Bul kásiporyndarda sıfrlyq ózgerister buǵan deıin de bastalǵanymen, Jol kartasy úderisterdi jańa deńgeıge kóterip, naqty ekonomıkalyq nátıje bere bastady.
Toqaev: Jasandy ıntellekt mamandandyrylǵan zertteý ýnıversıteti ashylady
Jol kartasynyń praktıkalyq kezeńi 2025 jylǵy qazanda iske qosylǵan Industrial AI Acceleration baǵdarlamasymen jalǵasty. Baǵdarlama qysqa merzim ishinde óndiris úshin ázir sheshimderdi iriktep, olardy engizýge daıyndaýǵa múmkindik berdi. Akselerasııaǵa ónerkásip kásiporyndarynyń, tehnologııalyq startaptardyń jáne salalyq sarapshylardyń 220-dan astam ókili qatysty, olardyń ishinde jasandy ıntellekt salasyndaǵy 20-dan astam sheteldik maman bar. Osy ýaqyt ishinde 95 trekshn-mıtıng, 50 saǵattan astam oqytý jáne praktıkalyq vorkshoptar ótti, áleýetti tapsyrys berýshilerge 136 JI-sheshim tanystyryldy.
Nátıjesinde 24 pılottyq joba bastama aldy. Onyń jeteýi qazirdiń ózinde ónerkásiptik paıdalanýǵa engizilse, qalǵan 17 joba 2026 jyldyń birinshi toqsanynda iske qosýǵa daıyndalyp jatyr.
Jol kartasy aıasynda «SaryarkaAvtoProm» avtozaýytynda jedel áreket etý ortalyǵy quryldy. Jasandy ıntellekt kameralar men datchıkterden keletin málimetterdi taldap, oqıǵalardy birden anyqtaıdy, kúzet júıesindegi adamı qateni azaıtady. Sonyń nátıjesinde ınsıdentterdi anyqtaý ýaqyty qysqaryp, jalǵan dabyldar sany tómendep, qaýipsizdikke biryńǵaı sıfrlyq baqylaý ornady.
Eýrazııalyq topta (ERG) óndiristik jáne bıznes-úderisterdi biriktiretin ERG MES sıfrlyq platformasy engizildi. Bul júıe ónim kólemin, tehnologııalyq parametrlerdi, shyǵyndar men jabdyqtardyń toqtap qalýyn naqty ýaqyt rejıminde baqylaýǵa múmkindik beredi. Platforma Aqtóbe jáne Aqsý ferroqorytpa zaýyttarynda, Qazaqstan elektrolız zaýytynda jáne Don taý-ken baıytý kombınatynda jumys istep tur. Qyzyp ketýden bolatyn toqtap qalýlar 75 paıyzǵa qysqarǵan, al anyqtalǵan aqaýlardyń 80 paıyzy operatorlar tarapynan rastalǵan.
Júıege MES Alina atty sıfrlyq assıstent te engizilgen. Ol daýys nemese mátin arqyly suranys qabyldap, qajetti esepterdi, ekrandardy ashyp, jabdyqtan derek suratady. Bul óndiristegi aýytqýlarǵa áreket etý ýaqytyn azaıtyp, operatorlardyń jumys tıimdiligin arttyrdy. Tek ótken jyly ERG MES engizýdiń ekonomıkalyq tıimdiligi shamamen 1,5 mlrd teńgeni quraǵan. Bul sıfrlandyrýdyń sán emes, naqty esep pen tabys kózi ekenin ańǵartady.
KAZ Minerals óndiristik alańdarynda da jasandy ıntellekt kezeń-kezeńimen engizilip jatyr. Abaı oblysyndaǵy «Aqtoǵaı» kenishinde tasymal aǵyndaryn ońtaılandyratyn HxGN Systems dıspetcherleý júıesi jańǵyrtylyp, JI quraldarymen tolyqtyryldy. Buryn aýdarma júk kóliginiń júrgizýshilerin dıspetcher qolmen baǵyttasa, endi bul úderis avtomatty túrde ári anaǵurlym dál oryndalady.
Al Solidcore Eurasia kompanııasynda qaýipti óndiriste jumys isteıtin qyzmetkerlerge arnalǵan avtomattandyrylǵan medısınalyq tekserý júıesi iske qosyldy.
Bul bastamalardyń júzege asýyna memlekettik qoldaý tikeleı yqpal etti. О́nerkásip jáne qurylys mınıstrligi QazIndustry ortalyǵynyń qatysýymen kásiporyndardy sıfrlyq transformasııalaý boıynsha oqytý júrgizip, konsýltasııalyq jáne uıymdastyrýshylyq kómek kórsetip keledi, sondaı-aq sıfrlyq tehnologııalardy engizýge jumsalǵan shyǵyndardyń bir bóligin óteıdi. О́tken jyly sarapshylar kásiporyndarda tehnologııalyq aýdıt ótkizip, óndiristi sıfrlandyrýǵa qatysty 20-dan astam usynym ázirledi. 240 adam qatysqan 14 vebınar uıymdastyryldy.
Bıyl Jol kartasy aıasyndaǵy sıfrlandyrý jumystary jalǵasady. Robottandyrylǵan tehnıka, ıntellektýaldyq júıeler, vıdeoanalıtıka, JI-assıstentter men sıfrlyq egizder, Big Data platformalary sekildi jobalardy iske asyrý josparlanǵan. Bul qadamdar el ónerkásibiniń sıfrlyq kemeldik deńgeıin edáýir arttyrýǵa múmkindik beredi.
