Is-shara aıasynda kelýshiler ulttyq naqyshtaǵy dızaınerlik buıymdarmen, dástúrli óner kórmelerimen, qazaqtyń ulttyq sport túrlerimen tanysty. Qusbegilik óner men júırik tazy ıtteri de kórermen nazaryn ózine aýdaryp, kóshpendiler órkenıetiniń tereń tarıhynan syr shertti.
Ult mádenıetiniń Qatar elindegi saltanaty
Mádenı kúnderdiń shoqtyǵy bıik sátteriniń biri – «Mezzo» vokaldyq tobynyń konserti boldy. Ujym álemdik klassıka men qazaqtyń ulttyq áýenderin úılestire otyryp, tyńdarmanǵa zamanaýı mýzykalyq týyndylar usyndy. Kesh barysynda kórermender oryndaýshylardyń joǵary kásibı deńgeıine tánti bolyp, erekshe áser aldy.
Sonymen qatar Qatardaǵy Qazaqstan mádenıeti kúnderinde «Joshy» etno-folklorlyq ansambliniń konserti ótti. Ujym qazaq halqynyń baı rýhanı murasyn ulttyq mýzyka arqyly jańasha qyrynan kórsetti. Dombyra, qobyz, jetigen, sybyzǵy sekildi dástúrli mýzykalyq aspaptarda oryndalǵan shyǵarmalar qazaq dalasynyń keń tynysyn, tarıhy men tabıǵatyn áýenmen órnektedi.
Árbir kompozısııa tyńdarmandy ótken men búgindi jalǵaǵan rýhanı saparǵa jetelep, qazaq mádenıetiniń tereńdigin sezindirdi. Konsertpen qatar uıymdastyrylǵan arnaıy kórmede ulttyq mýzykalyq aspaptar tanystyrylyp, olardyń tarıhy, jasalý ereksheligi men oryndaý tásilderi týraly keń maǵlumat berildi. Qonaqtar qazaqtyń dástúrli ónerimen jaqyn tanysyp, ulttyq mádenıettiń qyr-syryn tereńirek uǵynýǵa múmkindik aldy.
Qatardaǵy Qazaqstan mádenıet kúnderiniń uıymdastyrylýy eki el arasyndaǵy mádenı dıalogty nyǵaıtyp, otandyq mádenıetti halyqaralyq deńgeıde nasıhattaýǵa yqpal etti. Aldaǵy ýaqytta Qazaqstanda Qatar Memleketiniń mádenıet kúnderin ótkizý josparlanǵan.
