Aqtóbede Ata Zańǵa arnalǵan konferensııa ótti

AQTО́BE. 13 tamyz. «Nur Otan» partııasynyń Aqtóbe oblystyq fılıalynda Qazaqstan Repýblıkasy Konstıtýsııasynyń 20 jyldyǵyna arnalǵan konferensııa ótkizildi. Bul týraly egemen.kz tilshisi habarlady. Oblystyq máslıhat pen «Nur Otan» partııasynyń oblystyq fılıaly birlesip uıymdastyrǵan konferensııaǵa elimizge tanymal qoǵam qaıratkerleri, oblystyń qurmetti azamattary, oblystyq máslıhattyń birinshi jáne besinshi shaqyrylymdarynyń depýtattary, qalalyq jáne aýdandyq máslıhattardyń hatshylary, saılaý komıssııalarynyń tóraǵalary, sot, prokýratýra jáne ádilet organdarynyń, memlekettik mekemelerdiń basshylary men qyzmetkerleri, saıası partııalar men úkimettik emes uıymdardyń ókilderi qatysty. Alqaly saıası jıynnyń shymyldyǵy «Qazaqstan-Aqtóbe» telekompanııasynyń Konstıtýsııanyń 20 jyldyǵyna arnap túsirgen beınefılminiń kórsetilimimen ashyldy. Jıyn basynda oblystyq máslıhattyńı hatshysy Sánııa Qaldyǵulova sóz sóılep, Ata Zańymyzdyń aıshyqty qaǵıdattaryna nazar aýdardy. Ol bizdiń elimizde kóp ulttylyq jáne ultaralyq kelisimge basymdylyq beriletinine, 20 jyl boıy ustanyp kele jatqan Konstıtýsııamyzdyń bul qaǵıdattyń tıimdi atqarylýyna qyzmet etip kele jatqanyna toqtaldy. Parlament Májilisiniń ekinshi jáne úshinshi shaqyrylymdarynyń depýtaty, fılosofııa ǵylymdarynyń doktory Amangeldi Aıtaly «Konstıtýsııa – Qazaqstannyń negizgi zańy» degen taqyrypta baıandama jasady. Ol memleket saıasatynyń túp qazyǵy Ata Zań ekenine nazar aýdara kelip, elimizdegi Konstıtýsııanyń qalyptasý joldaryn saralaı áńgimeledi. El egemendiginiń, memleket táýelsizdiginiń berik tuǵyry – Ata Zańymyz týraly tarıh ǵylymdarynyń doktory Nurtaza Abdollaev, mádenıet qaıratkeri Erkin Qumanbaekov tolymdy pikirler aıtyp, tarıh kóshindegi Ata Zańymyz ben memlekettik rámizderimizdiń mańyzyn asha tústi. Konferensııa barysynda aıtýly dataǵa oraı, elimizdiń konstıtýsııalyq negiziniń qalyptasýy men damýyna eleýli úles qosqany jáne elimizdiń qoǵamdyq-saıası ómirindegi ıgilikti isteri jáne belsendilikteri úshin bir top aqtóbelikterge «Qazaqstan máslıhatyna – 20 jyl» merekelik medali men oblystyq máslıhatttyń Alǵys hattary tapsyryldy. Satybaldy Sáýirbaı. Derek, sýret: egemen.kz.