Atyraýda polısııa qyzmetkeri adam óltirý kúdigimen qamaldy

ATYRAÝ. 13 tamyz. Atyraý oblysynda polısııa qyzmetkeri adam óltirý kúdigimen qamaýǵa alyndy. Bul týraly oblystyq ishki ister departamentiniń baspasóz qyzmeti habarlady. Ishki ister basqarmasyna jergilikti azamat týysynyń iz-tússiz joǵalǵany týraly shaǵymdanǵan. «О́zbekstan Respýblıkasynyń 1987 jyly týǵan azamaty, úı ıeleri demalysqa ketkende osynda turyp qalǵan. Aryzdanýshynyń aıtýynsha, tamyzdyń 5-nen bastap týysynyń telefony óshirýli, baılanys bolmaǵan. Páter qulpy buzylmaǵan, biraq ishinde aqshasy men altyn buıymdar saqtalǵan temir jáshik bolmaı shyqqan. Jedel ýákildermen joǵalǵan azamatty izdestirý barysynda bul qylmysqa polısııa qyzmetkeriniń qatysy bar degen aqparat alyndy», – dep habarlady oblystyq ishki ister departamentiniń baspasóz hatshysy Gúlnázıra Muhtarova. Ishki ister departamenti bastyǵynyń birinshi orynbasarynyń jetekshiligimen quramynda ózindik qaýipsizdik basqarmasy qyzmetkerleri bar jedel tergeý-izdestirý toby qurylyp, qylmysqa kúdikti 1989 jyly týǵan О́zbekstan azamaty ustalyp, odan aıǵaq zattar, altyn buıymdar tabylyp, tárkilendi. Sonymen birge, osy qylmysqa kúdikti 1993 jyly týǵan polısııa qyzmetkeri de  anyqtalyp, ustaldy. Izdestirý sharalarynyń nátıjesinde qaladan 33 shaqyrym qashyqtaǵy Atyraý-Inder tas jolynyń Alǵa aýyly tusynda, dalada kómilip tastalǵan jábirlenýshiniń denesi tabylyp alyndy. Qazir kúdikti ekeý, biri – polısııa qyzmetkeri, ekinshisi – О́zbekstan Respýblıkasynyń azamaty ýaqytsha oqshaýlaý ornyna qamaýǵa alyndy. Olarǵa Qylmystyq kodekstiń úsh birdeı babymen, atap aıtqanda, 125-bap «(Adam urlaý), 192-bap (Qaraqshylyq) jáne 99-bap (Adam óltirý) boıynsha sotqa deıingi tergeý amaldary júrýde. Joldasbek Shópeǵul. Derek: Atyraý oblystyq ishki ister departamentiniń baspasóz qyzmeti. Sýret: azh.kz.