Tabyl Qulyıas – san qyrly qalamger. Ádebıettegi alǵashqy jolyn satıradan bastaǵan jazýshy keıin tarıhı tulǵalar týraly kólemdi týyndylarǵa qalam tartty. Ásirese avtordyń ataqty jyraý ári erjúrek tulǵa «Jıembet batyr» týraly roman-essesi men Jıenǵalı Tilepbergenov jaıyndaǵy «Ańyz izimen» atty romanyn oqyrmandar jyly qabyldady. Sondaı-aq qalamgerdiń zertteýshiligi de – bir tóbe. Onyń XX ǵasyrdaǵy halqymyzdyń basynan ótken túrli zulmatty beınelegen «Qanjosa ǵasyr» kitaby muraǵattyq derektermen jazylǵan.
Is-shara barysynda Tabyl Qulyıastyń ónegeli ómiri, adamı qasıeti, jýrnalıstik qyzmeti men shyǵarmalary týraly estelikter aıtyldy. Jıyndy atalǵan ýnıversıtettegi fılologııa fakýltetiniń dekany, aqyn Serikzat Dúısenǵazın júrgizdi. Keshte aldymen sóz alǵan belgili ǵalym, jazýshy Tursyn Jurtbaı qalamgerdi erteden biletinin aıtty.
«Ol kisiniń esimin mektepte oqyp júrgende respýblıkalyq basylymdardan jıi kezdestiretinmin. Sonaý 60-80-jyldardyń ortasyndaǵy Aqtóbe men Torǵaı óńirindegi adamdardyń taǵdyryn, olardyń qýanyshy men qaıǵysyn osy Tabyl aǵamyzdyń jazǵandary arqyly bilip júrdik. Keıin prozalyq shyǵarmalarymen tanystym. Qalamger kózi tirisinde qazaqtyń kóptegen tulǵasymen jaqyn aralasty. Solar týraly aıtatyn qyzyqty áńgimeleri kóp edi. Sonyń biri – ataqty ǵalym Ishanbaı Qaraqulov bolatyn», dedi ol. Odan keıin akademık Dıhan Qamzabekuly Tabyl aǵamyzdyń ózi basqaryp otyrǵan «Qazaq gazetteri» seriktestiginiń ardageri retinde de qadiri bólek bolǵanyn jetkizdi.
«Byltyr bizdiń balalar basylymdarynyń birqatary aıtýly mereıtoılaryn atap ótti. Tabyl aǵamyz osy basylymdarǵa ótken ǵasyrdyń 60-70-jyldary úzbeı jazyp turǵan avtor retinde de úlken orny bar. Budan keıin táýelsizdiktiń alǵashy kezeńinde Selınograd ataýyn Aqmolaǵa aýystyrýǵa da zor úles qosty. Tarıhymyzdy túgendeýge de aıanbaı eńbek etti. Reseıdegi Orynbor, Saratov qalalaryndaǵy arhıvterge baryp, aqtańdaq jyldarǵa qatysty qanshama qundy tarıhı málimetter tapty. Sonyń negizinde derekti shyǵarmalar jazdy», dedi ǵalym.
Jıyn aıasynda Parlament Májilisiniń depýtaty Marat Báshimov, ǵalym Serik Negımov, «Habar agenttigi» AQ basqarma tóraǵasy Kemelbek Oıshybaev, akademık Kárimbek Qurmanalıev, taǵy basqa tanymal azamattar sóz alyp, ardaqty tulǵanyń jan-jaqty qyryn ashyp sóıledi. L.N.Gýmılev atyndaǵy Eýrazııa ulttyq ýnıversıtetiniń akademııalyq máseleler jónindegi prorektory Ardaq Beısenbaı atalǵan oqý orynnyń rektory Erlan Sydyqovtyń izgi lebizin oqyp berdi. Belgili ánshi, Memlekettik syılyqtyń laýreaty Kenjeǵalı
Myrjyqbaı áýeletip án saldy. Qalamgerdiń jańa jınaqtary tanystyryldy. Is-shara sońynda jazýshynyń jary Kúlásh Mahanova osy sharany uıymdastyrýshylar men jınalǵan qaýymǵa rızashylyǵyn bildirdi.
