Sýret: inbusiness.kz
«Qazir elimizdegi taýardyń 60 paıyzy temirjolmen tasymaldanady. Sondyqtan temirjol jelilerin barynsha damytý – aıryqsha mańyzdy mindet. Búginde birqatar iri ınfraqurylym jobasynyń qurylysy aıaqtaldy. Temirjol arqyly júk tasymaldaý múmkindigi edáýir jaqsaryp, temirjoldyń jalpy jaǵdaıy turaqtaldy. Desek te, elimizdiń temirjol tranzıti salasyndaǵy áleýetin tolyǵymen paıdalanýymyz qajet. Alaıda bul mańyzdy másele boıynsha anyq, aıqyn strategııa áli joq sııaqty. Tozyǵy jetken temirjol ınfraqurylymy áli de kóp. Keıbir jerlerdegi ahýal tipti kúrdeli deýge bolady. Bıyl «Moıynty – Qyzyljar», «Darbaza – Maqtaaral» baǵytyndaǵy jańa temirjol jelilerin iske qosý kerek. Sondaı-aq «Altynkól – Jetigen» jáne «Beıneý – Mańǵystaý» temirjolyn jańǵyrtý jumystaryn aıaqtaý qajet. «Baqty – Aıagóz» jelisin ýaqtyly paıdalanýǵa berý kerek», dedi Memleket basshysy.
Prezıdent atap ótken strategııalyq mańyzy bar «Darbaza – Maqtaaral temirjol jelisiniń qurylysy» jobasyn tolyq iske qosý 2026 jyldyń jeltoqsan aıyna josparlanǵan. Túrkistan oblysy ákimdiginiń habarlaýynsha, qurylys alańynda atqarylyp jatqan jumystardyń barysy qatań baqylaýǵa alynǵan. Jobanyń qurylysyn «Qazaqstan temir joly» UK» AQ tapsyrysymen «Integra Construction KZ» JShS júrgizip jatyr. Jýyrda oblys ákimi Nuralhan Kósherovtiń «Qazaqstan temir joly» UK» AQ-nyń qurylys jónindegi basqarýshy dırektory Marat Isqalıevpen jáne jobany iske asyrýshy «Integra Construction KZ» JShS ókilderimen kezdesýinde qurylys barysyndaǵy ózekti máseleler men olardy sheshý joldary jan-jaqty talqylandy. Jobanyń negizgi maqsaty – «Darbaza – Maqtaaral» jańa temirjol jelisi arqyly júk jáne jolaýshylar tasymalynyń kólemin arttyrý, tranzıttik tasymaldardy ashý, jańa baǵyttardy iske qosý, sondaı-aq Túrkistan – Shymkent – Tashkent ýchaskesindegi ótkizý qabiletin táýligine 35 jup poıyzǵa deıin ulǵaıtý.
«Qazaqstan temir joly» UK» AQ-nyń qurylys jónindegi basqarýshy dırektory Marat Isqalıevtiń aıtýynsha, qazirgi ýaqytta aıaqtalǵan jer qazý jumystarynyń jalpy kólemi 9,1 mln tekshe metrdi quraıdy. 19,8 shaqyrymǵa relsti shpal tory tóselgen. Sonymen qatar kópirler men ótkelder salý, sý qubyrlaryn júrgizý, jasandy qurylymdardy montajdaý jumystary qarqyndy atqarylyp otyr. Jer tegisteý jumystary 70 paıyzǵa aıaqtalǵan. Syrdarııa ózeni jaǵalaýyndaǵy jumystar júrgizilip keledi. Sondaı-aq temir jol boıyna shaǵal tóselip, kópirler salynyp jatyr. «Erdáýit» stansasynan ózenge deıin 7 kópir salynǵan. Bul jumystarǵa jalpy sany 560-tan astam adam men 400-ge jýyq arnaıy tehnıka jumyldyrylǵan.
Temirjol jelisiniń uzyndyǵy 172 shaqyrymdy quraıdy. Jańa baǵyt «Saryaǵash» ótkizý pýnktiniń júktemesin túsiredi, sondaı-aq Saryaǵash, Keles, Jetisaı, Maqtaaral men Shardara aýdandaryn baılanystyrady. Atalǵan baǵyttyń ótkizý qabiletin edáýir arttyryp, magıstraldyq kólik, kedendik jáne shekaralyq ınfraqurylymnyń damý deńgeıin kóterýge múmkindik beredi. Budan bólek, oblystyń áleýmettik-ekonomıkalyq áleýetin arttyryp, jańa óndiristerdiń ashylýyna, qosymsha jumys oryndarynyń qurylýyna yqpal etedi.
Memleket basshysy Qasym-Jomart Toqaev Ulttyq quryltaıdyń V otyrysynda eldegi kólik ınfraqurylymyn damytý máselesine erekshe toqtalǵan edi. Sonyń ishinde Saryaǵash qalasy mańyndaǵy kólik qozǵalysynyń tyǵyz ekenin atap ótip, osy máseleni sheshý maqsatynda bıyl «Saryaǵash aınalma joly» jobasynyń qurylysyn qolǵa alý qajettigin aıtty.
Al kúni keshegi Úkimet otyrysynda temirjolmen qatar avtokólik tasymalyn damytýǵa qatysty iri jobalardy da júzege asyrý barysyn qatań baqylaýǵa alýdy tapsyrdy. Saryaǵash aınalma jolynyń jalpy uzyndyǵy 102 shaqyrym bolady. Jobalaý-smetalyq qujattamanyń quny – 238,1 mlrd teńge. Bul – I b sanatyndaǵy tórt jolaqty avtomobıl joly. Joba respýblıkalyq mańyzy bar A-15 avtomobıl jolyna balama baǵyt retinde qyzmet atqaryp, Saryaǵash qalasy men oǵan irgeles aýmaqtardaǵy kólik júktemesin azaıtady. Tranzıttik kólikterdiń kedergisiz qozǵalysyn qamtamasyz etýge múmkindik beredi. Sonymen qatar jol qozǵalysy qaýipsizdigi artyp, óńirdiń kólik-logıstıkalyq áleýetin damytýǵa oń áserin tıgizedi. Túrkistan oblysy ákimdiginiń habarlaýynsha, Memleket basshysynyń tapsyrmalaryn ýaqtyly ári sapaly oryndaý baǵytyndaǵy jumystar turaqty baqylaýǵa alynyp, jobanyń belgilengen merzimde iske asýy qamtamasyz etilmek. Qurylys jumystary bıyl bastalmaq.
Túrkistan oblysy
