Basqosýda Ǵylym jáne joǵary bilim mınıstri, redaksııalyq alqa tóraǵasynyń orynbasary Saıasat Nurbek irgeli eńbektiń 1-4 tomdaryn basyp shyǵarý aldyndaǵy daıyndyq jumystary týraly baıandady.
Ulttyq aýdarma bıýrosynyń dırektory Raýan Kenjehanuly kóptomdyqtyń dızaın-tujyrymdamasyn tanystyrdy.
«Jalpy, keıingi jyldary otandyq ǵylym kópǵasyrlyq tarıhymyzdy keshendi zerdeleý baǵytynda eleýli jetistikterge qol jetkizdi. Osy turǵydan alǵanda tarıhymyzdyń akademııalyq jeti tomdyǵy bizdiń qoǵamnyń biregeıligi men tarıhı jadynyń tutastyǵyn qalyptastyrýda negizgi quraldardyń birine aınaldy. Sondaı-aq jańa Konstıtýsııa jobasynyń preambýlasy da biregeıligimizdi nyǵaıtýdyń mańyzdy faktory sanalady. Onda Uly dalanyń myńdaǵan jyldyq tarıhynyń sabaqtastyǵy naqty kórinis tapqan», dedi E.Qarın.
Redaksııa alqasy otyrysta Qazaqstan tarıhynyń HIH jáne HH ǵasyrdyń basyndaǵy kezeńine arnalǵan besinshi tomnyń qoljazbasyn qarady.
Atalǵan tomnyń jańartylǵan qurylymy men mazmunyn avtorlar ujymynyń jetekshisi, tarıh ǵylymdarynyń doktory, Sh.Sh.Ýálıhanov atyndaǵy Tarıh jáne etnologııa ınstıtýtynyń dırektory, akademık Zııabek Qabyldınov tanystyrdy.
Sonymen qatar tarıh ǵylymdarynyń doktory, professor Murat Ábdirovtiń, tarıh ǵylymdarynyń kandıdaty, Ortalyq memlekettik arhıv dırektory Sábıt Shildebaıdyń, Parlament Májilisiniń depýtaty Aıdos Sarymnyń, tarıh ǵylymdarynyń kandıdaty Kúlǵazıra Baltabaevanyń resenzııalary tyńdaldy.
Budan bólek, redaksııa alqasynyń Andreı Chebotarev, Galına Ksenjık, Jaqsylyq Sábıtov, Dıhan Qamzabekuly, Búrkitbaı Aıaǵan, Jáken Taımaǵambetov, Aıdos Sarym, Mámbet Qoıgeldıev sekildi basqa da músheleri óz oı-pikirin ortaǵa saldy.
Jıyn sońynda akademııalyq basylymnyń besinshi tomyn jetildirý jumysyn odan ári jalǵastyrý jáne kelesi otyrysta kóptomdyqtyń altynshy tomyn qarastyrý týraly sheshim qabyldandy.
