Jańa qujatqa sáıkes, elimizde nómirdi kóshirý rásimin jetildirýdiń birqatar tetikteri qarastyrylǵan. Sonyń ishindegi eń mańyzdysy – donor-operatorǵa (nómirdi berýshi tarapqa) abonenttiń ótinishinen bas tartý quqyǵyn berý. Eger abonenttik nómir alǵash belsendirilgen sátten bastap 60 kún ótpegen bolsa, operator ony basqa jelige kóshirýden zańdy túrde bas tarta alady. Qujattyń sıpattamasynda bul ózgeris naryqtaǵy teris paıdalanýshylyqtyń aldyn alýǵa jáne baılanys provaıderleriniń múddesin qorǵaýǵa baǵyttalǵany atap ótilgen.
Sonymen qatar mınıstrlik abonentter úshin qolaıly jaǵdaı jasaý maqsatynda donor-operatordyń suranysqa jaýap berý merzimin qatańdatýdy usynyp otyr. Endigi kezekte operator nómirdi kóshirý týraly suranym túsken sátten bastap 10 mınýttan aspaıtyn ýaqyt ishinde resmı jaýabyn qaıtarýǵa mindetteledi.
«Túzetýlerdiń negizgi maqsaty – nómirdi kóshirý rásimin zamanaýı talaptarǵa saı jetildirý jáne klıentterge barynsha yńǵaıly jaǵdaı jasaý. Bul qadam abonenttiń baılanyssyz qalatyn kezeńin barynsha qysqartýǵa jáne qyzmet kórsetý sapasyn jańa deńgeıge kóterýge múmkindik beredi», dep túsindirdi vedomstvo ókilderi.
