Atalǵan top aldymen Qostanaı qalasynda qoǵamdyq uıymdar men azamattyq qoǵam ókilderimen jáne kásipker áıeldermen kezdesti. Jıynǵa 200-ge jýyq azamat qatysty. Ashyq ári mazmundy áńgime barysynda qatysýshylar óz pikirlerimen bólisip, kókeılerindegi saýaldaryn qoıdy. Jurtshylyq Ata zańnyń el bolashaǵy úshin mańyzy, tarıhı dástúrler sabaqtastyǵy, qoǵamnyń toptasýy men eldiń damýyndaǵy rýhanı qundylyqtardyń alatyn orny týraly aıtty.
Is-sharada Parlament Májilisiniń depýtaty, Jalpyulttyq koalısııa múshesi Ekaterına Smyshlıaeva jańa Konstıtýsııada Uly Dalanyń myńjyldyq tarıhynyń mádenı kody bar ekenin aıtty. Onyń aıtýynsha, jańa Konstıtýsııadaǵy bilimniń, ǵylymnyń jáne ınnovasııanyń qundylyqtary týraly normalar osy salalardy bıýdjetten qarjylandyrýdy negizsiz qysqartýdan qorǵaıdy.
Jambyl oblysynda Konstıtýsııalyq reformanyń saıası jańǵyrýdaǵy róli talqylandy
«Jańa Konstıtýsııa Ádiletti Qazaqstannyń berik quqyqtyq negizin qalyptastyrady. Ol zań ústemdigin nyǵaıtýǵa, áleýmettik ádilettilikti qamtamasyz etýge jáne árbir azamattyń óz áleýetin júzege asyryp, el damýyna úles qosýǵa jaǵdaı jasaýǵa baǵyttalǵan», dedi depýtat.
Talqylaý barysynda Qazaqstannyń Azamattyq Alıansynyń prezıdenti Baný Nurǵazıeva konstıtýsııalyq reformalar memleket pen qoǵam arasyndaǵy ózara senimdi nyǵaıtyp, azamattardyń memlekettik ınstıtýttarǵa degen senimin arttyratynyn jáne azamattyq qoǵamnyń mańyzdy sheshimder qabyldaýǵa qatysýyn keńeıtetinin atap ótti.
Odan ári Jalpyulttyq koalısııanyń jumysy Borovskoe aýylynda jalǵasty. Koalısııa músheleri aýyl turǵyndarymen jáne birqatar eńbek ujymymen kezdesip, jańa Konstıtýsııa jobasynyń mazmunyn jan-jaqty túsindirdi. Jıynǵa 300-ge jýyq turǵyn qatysty.
О́z sózinde Májilis depýtaty, Koalısııa múshesi Erkin Ábil aldaǵy referendýmnyń tarıhı mańyzyn erekshe atap ótti. Onyń aıtýynsha, bul saıası naýqan – el damýynyń jańa kezeńin aıqyndaıtyn jaýapty kezeń. Referendým arqyly azamattar memlekettiń bolashaq baǵytyn aıqyndaýǵa tikeleı qatysyp, qoǵamdyq kelisim men ádilettilik qaǵıdattaryn nyǵaıtýǵa óz úlesin qosady.
Al Májilis depýtaty, Koalısııa múshesi Aıdarbek Hodjanazarov preambýlada Uly Dalanyń myńjyldyq tarıhynyń sabaqtastyǵy kórinis tabýy memlekettiń biregeıligin aıqyndap, damý baǵdaryn belgileıtinin jetkizdi. Ol kez kelgen qýatty memlekettiń taǵdyry onyń zańdarymen, tarıhı sabaqtastyǵymen jáne halyqtyń asqaq rýhymen aıqyndalatynyn atap ótti.
Budan soń Koalısııa músheleri Áýlıekól aýylyndaǵy aýdandyq mádenıet úıinde turǵyndarmen kezdesti. Jıyn barysynda atalǵan top jobadaǵy negizgi novellalar týraly baıandady. Májilis depýtaty Berik Beısenǵalıev adam quqyǵyna kepildik berý aıasy keńeıgenine jáne azamattardyń áleýmettik turǵyda qorǵalýyna nazar aýdardy.
Sondaı-aq atalǵan top Qostanaı oblysynyń Lısakovsk, Tobyl qalalarynda jáne Qarabalyq, Fedorov aýdandarynda da eńbek ujymdarymen birqatar kezdesý ótkizdi. Onyń barysynda azamattar jańa Konstıtýsııa jobasy qoǵam suranysyna jaýap beretinin, memlekettiń quqyqtyq negizin nyǵaıtyp, azamattardyń ózin damytýyna qajet jańa múmkindikterge jol ashatynyn atap ótti. Is-sharalarǵa qatysýshylar 15 naýryzda referendýmǵa kelip, Qýatty, Ádiletti jáne Progressıvti Qazaqstan qurýǵa baǵyttalǵan jańa Ata zańdy qoldaýǵa daıyn ekenderin bildirdi.
Eske sala keteıik, «Ádiletti jáne Progressıvti Qazaqstannyń Halyqtyq Konstıtýsııasy úshin!» jalpyulttyq koalısııasy 12 aqpanda quryldy. Onyń quramyna 5 saıası partııa men shamamen 300-ge tarta qoǵamdyq uıym kirdi. Olar shamamen 5 mıllıon qazaqstandyqty biriktiredi.
