Mınıstrliktiń málimdeýinshe, Qazaqstan «SCImago Research Group» (SCImago Country Rank) halyqaralyq ǵylymı belsendilik reıtınginde Ortalyq Azııa elderi arasynda birinshi oryndy ıelenip, ǵylym salasyndaǵy jetekshi pozısııasyn taǵy bir márte dáleldedi. Baqylaýdyń barlyq kezeńi boıynsha (1996–2024 jyldar) jınaqtalǵan derekterge sáıkes respýblıka álemdik reıtınginde 69-orynǵa ornalasyp, óńirdegi ózge memleketterden aıtarlyqtaı ozyq tur. Al 2024 jyldyń qorytyndysy boıynsha Qazaqstan 64-orynǵa kóterilip, ulttyq ǵylymnyń turaqty damýy men jarııalanymdyq belsendiliktiń artqanyn kórsetti.
Qazaqstannyń «SCImago» reıtıngindegi kóshbasshylyǵy júıeli ári presedenttik sıpatqa ıe. Ortalyq Azııa elderimen aradaǵy alshaqtyq ondaǵan, tipti júzden astam oryndy quraıdy: О́zbekstan – 83-orynda, Qyrǵyzstan – 130-orynda, Tájikstan – 147-orynda, Túrikmenstan 191-orynda tur. Bul kórsetkishter ǵylymdy qarjylandyrý deńgeıindegi, zertteý ınfraqurylymynyń damýyndaǵy, kadrlyq áleýettegi, halyqaralyq ǵylymı yqpaldastyq dárejesindegi jáne ǵylymı jarııalanymdar sapasyndaǵy aıyrmashylyqtardy aıqyn kórsetedi.
«Ǵylym jáne tehnologııalyq saıasat týraly» zańyn iske asyrý aıasynda óńirlik ınnovasııalyq júıelerdi damytýǵa, akademııalyq jáne zertteýshilik artyqshylyq ortalyqtaryn qalyptastyrýǵa, bıznestiń qatysýymen ǵylymı zertteýlerdi birlesip qarjylandyrý tetikterin engizýge, sondaı-aq jas ǵalymdardy júıeli túrde qoldaýǵa basymdyq beriledi. Sonymen qatar otandyq ǵylymı uıymdardyń «Horizon Europe» sekildi halyqaralyq baǵdarlamalarǵa qatysýyn keńeıtý mańyzdy baǵyttardyń biri bolyp qala bermek, bul otandyq ǵylymnyń jahandyq zertteý keńistigine yqpaldasýyna múmkindik beredi.
«SCImago Research Group» halyqaralyq ǵylymı belsendilik reıtıngi álem elderiniń ǵylymı jáne zertteýshilik áleýetin baǵalaýdyń eń bedeldi quraldarynyń biri sanalady. Reıtıng «Elsevier» kompanııasyna tıesili «Scopus» halyqaralyq bıblıometrııalyq derekqorynyń málimetteri negizinde qalyptastyrylady jáne ýnıversıtetter, ǵylymı zertteý ınstıtýttary men ortalyqtardyń qyzmetin tutastaı qamtıdy. Reıtıng ádisnamasy halyqaralyq resenzııalanatyn jýrnaldardaǵy ǵylymı jarııalanymdar sanyn, olardyń dáıeksóz alý deńgeıin, halyqaralyq ǵylymı yntymaqtastyqty, zertteýler sapasyn, sondaı-aq ǵylymnyń ınnovasııalyq jáne tehnologııalyq damýǵa qosqan úlesin eskeredi.
Qazaqstannyń «SCImago» reıtıngindegi pozısııasynyń nyǵaıýy júrgizilip jatqan reformalardyń tıimdiligin dáleldep qana qoımaı, eldiń Ortalyq Azııadaǵy ǵylymı jáne zııatkerlik kóshbasshy retindegi halyqaralyq bedelin de arttyrady. Bilim men tehnologııalar úshin jahandyq básekelestik jaǵdaıynda bul nátıje – ulttyq ǵylymı júıeni odan ári damytýǵa jáne el men óńirdiń áleýmettik-ekonomıkalyq órkendeýine qosatyn úlesin arttyrý jolyndaǵy mańyzdy strategııalyq baǵdar.
