Ekspozısııada Ilııas Jansúgirovtiń tutynǵan zattary, sırek qoljazbalar, fotosýretteri men qundy arhıvtik qujattar bar. Aqynnyń Qyzylorda el baıtaǵy atanǵan tustaǵy shyǵarmashylyq izdenisteri men qoǵamdyq qyzmeti kórmede keńinen qamtylyp, sol dáýirdiń ádebı-rýhanı tynysy aıqyn kórinis tapqan.
Aqyn kıgen bylǵary plash pen tik jaǵa jeıde, shyǵarmalaryn basqan «Mersedes» markaly jazý máshińkesiniń janyna jınalǵandar qatary kóp eken. Qyzylordada shyqqan shyǵarmalary, qalamdastarymen túsken fotolar jazyqsyz jalaly bolyp aıyptalǵan kezindegi qujattarǵa jalǵasady. Aıyptaý úkimi, jınaq kitapshasy, tólqujaty, keıbir shyǵarmalarynyń qoljazbasy da tur.
«Reseıde «Vystavka odnogo eksponata» degen joba bar. Jansúgirov jádigerleriniń árqaısysynan sondaı kórme jasaýǵa bolady», deıdi Qyzylorda oblystyq tarıhı-ólketaný mýzeıi dırektorynyń orynbasary Janat Ahmetova.
Aqyn atyndaǵy ádebı mýzeı meńgerýshisi Nurgúl Jaýynbaevanyń aıtýynsha, mekeme ornalasqan Taldyqorǵandaǵy ǵımarat tarıhı nysandar qataryna jatady. «Qosshy» uıymynyń ókili retinde aqyn birneshe márte bolǵan úı onyń týǵanyna 90 jyl tolýyna oraı 1984 jyly mýzeı bolyp ashylypty.
«Qazir mýzeıde 6 myńnan astam jádiger saqtaýly tur. Olardyń qatarynda ózi ustaǵan zattar men shyǵarmalarynan bólek ilııastanýshylardyń eńbekteri de bar. Sonymen qatar Ilııas – alǵashqy kásibı bilim alǵan jýrnalıst. Qazir qaıratkerdiń Máskeýdegi Jýrnalıstıka ınstıtýynda oqyǵan kezeńine qatysty qujattardy izdestirý ústindemiz. Oqýdan keıin Qyzylordadaǵy «Eńbekshi qazaq» gazetine qyzmetke kelgen aqynǵa qatysty sondaı derekter osy Syr elinen tabylyp qala ma degen úmitimiz bar», deıdi N.Jaýynbaeva.
QYZYLORDA
