Elimizdiń barlyq óńirin qamtyǵan aqparattyq naýqannyń aýqymy kún sanap keńeıip keledi. Túsindirý jumystary endi aýyl-aımaqtarǵa deıin jetip, óńirlerde «Esikten esikke» aksııasy bastaý aldy. Sonymen qatar, koalısııa quramyndaǵy respýblıkalyq jastar uıymdary joǵary oqý oryndary men kolledj stýdentteri arasynda arnaıy kezdesýler ótkizip, referendýmnyń máni men mańyzyn jan-jaqty túsindirýde.
Jalpyulttyq koalısııa shtabynyń múshesi, Abaı oblystyq «Jastar Rýhy» tóraǵasy Temirlan Baqtııarov naýqannyń Jańasemeı aýdanyna qarasty Jarqyn aýylynda jalǵasyp jatqanyn atap ótti.
«Koalısııa belsendileri oblys ortalyqtary men qalalardan bólek, aýdan jáne aýyl turǵyndaryn da tolyq qamtýǵa basymdyq berip otyr. Búgin Jarqyn aýylynda halyqpen júzdesip, aldaǵy referendýmnyń tarıhı mańyzyn jáne usynylyp otyrǵan jańa Konstıtýsııa jobasynyń negizgi baǵyttaryn túsindirdik. Turǵyndar tarapynan qoıylǵan saýaldarǵa naqty jaýap berilip, ashyq pikir almasý uıymdastyryldy», dedi ol.
Naýqanǵa koalısııa quramyna engen respýblıkalyq jastar birlestikteri de belsendi atsalysýda. Atap aıtqanda, «Jastar Rýhy» jastar qanaty, «Esbol Qory», «Assambleıa jastary» respýblıkalyq jastar uıymy, «Jasyl el» respýblıkalyq jastar eńbek jasaǵy jáne «Aýyl jastary» qanatynyń jetekshileri bastaǵan top Kókshetaý qalasynda aqparattyq-túsindirý sharalaryn ótkizdi.
Sondaı-aq, aksııa aıasynda bastaý alǵan «Esikten esikke» bastamasy arqyly turǵyndarmen jeke kezdesýler uıymdastyrylyp, ár azamatqa referendým tóńiregindegi ózgerister keńinen baıandalýda. Qosymsha aqparattyq paraqshalar taratylyp, usynystar men pikirler nazarǵa alynýda.
Jambyl oblysy Talas aýdany Kóktal aýylynyń turǵyny Bıbijan Taspanqyzy naýqan jóninde oıyn ortaǵa saldy.
«Jastardyń aýylymyzǵa arnaıy kelip, ár baǵytty qarapaıym tilmen túsindirip bergeni qýantady. Kópshiliktiń kókeıinde júrgen suraqtarǵa jaýap aldyq. Osyndaı ashyq kezdesýler halyqtyń sanaly sheshim qabyldaýyna kómektesedi dep oılaımyn», dedi ol.
Qazirgi tańda koalısııa músheleri aımaqtardaǵy túsindirý kezdesýlerin odan ári jalǵastyrýda. Referendým qarsańynda eńbek ujymdarymen, sarapshylar qaýymymen jáne jergilikti turǵyndarmen júzdesýler ótkizý arqyly ashyq dıalog alańdaryn keńeıtý josparlanǵan. Basty maqsat – ár azamattyń jan-jaqty aqparat alyp, el bolashaǵyna qatysty sheshimdi jaýapkershilikpen qabyldaýyna múmkindik jasaý.
