Buryn darııa jaǵalaýyndaǵy jurt kóktem týa qarbalasyp jatatyn. Arnany shiregen muz erigen sátte talaı bógetti jyryp ketip, myńdaǵan adam talaı márte qaýipsiz aımaqqa kóshirilgen. Keıingi jyldary darııanyń deńgeıi qysta da kóterilmeı, mundaı dúrbeleńdi baıqaǵanymyz joq. Degenmen tótenshe jaǵdaı salasy ókilderi tehnıkalaryn saılap, qaýipti aımaqtardy baqylaýda ustap otyr.
«Qazgıdromet» mekemesiniń málimetine súıensek, aqpannyń aıaǵy men naýryzdyń basynda seń tolyq júre bastaıdy. Sý tasqynyna qarsy materıaldyq-tehnıkalyq qor jetkilikti, qabyldaý, evakýasııalaý pýnktteri daıyn. Jaǵdaıdy qalt jibermeı qadaǵalap otyrǵan oblystyq tótenshe jaǵdaılar departamenti mamandarynyń dereginshe, qazir Shardara sý qoımasynan darııa arnasyna sekýndyna 300 tekshe metr sý túsip jatyr. Onyń basym bóligin Kóksaraı sý rettegishi qabyldap, oblys aýmaǵyna 106 tekshe metri kelip tur. Tótenshelikter byltyr sý kólemi budan úsh ese kóp bolǵanyn aıtady.
– Árıne, sý kólemi azdyǵyn maldanyp qarap otyrmaımyz. Sý tasqyny bola qalǵan jaǵdaıda qajetti 117,9 tonna janar-jaǵarmaı, 139 902 qap, 17 710 baý qamys, 5 865 pashyn, 239 tonna qoıtas, 2 381 qarabýra sekildi ınertti materıal jınaqtaldy. Qaýip tóne qalǵan jaǵdaıda kómekke oblysta 135 mekeme, 410 tehnıka, 1 234 adam bekitilgen. Bizdiń tarapymyzdan 123 adam, 23 tehnıka, 6 júzý quraly, 33 motopompa, 2 tikushaq daıyn, – deıdi departamenttiń basqarma bastyǵy Ashat Orazbekov.
Sý tasqyny bola qalǵan jaǵdaıǵa laıyqtalyp 51 jınaqtaý, 70 qabyldaý pýnktteri daıyndaldy. Muz jarý jumysymen aınalysatyn mamandandyrylǵan uıym da saqadaı saı tur.
О́ńirde 2025–2026 jyldary jazǵy-kúzgi mezgilderde sý tasqynynyń aldyn alý baǵytynda atqarylatyn is-sharalardyń ınjenerlik jospary bekitilgen. Byltyr josparǵa engen 9 nysanda jumys júrip, jergilikti atqarýshy organ men sý sharýashylyǵy mekemesiniń mamandarynan qurylǵan jumysshy top gıdrotehnıkalyq qurylǵylardy zerttedi.
Oblystyq jumyldyrý daıyndyǵy, aýmaqtyq jáne azamattyq qorǵanys basqarmasy da qamsyz emes. Basqarma ókilderi ózen arnasynan asa qalsa monıtorıng jumystaryn júrgizý maqsatynda tikushaq qyzmetin paıdalanýǵa, muz jarý jumystaryna, ózge de qajetti materıaldarǵa bıýdjetten qarjy bólingendigin aıtady.
Jaqynda bul másele «Amanat» partııasynyń oblystyq fılıalynda da qaraldy. Partııalyq baqylaý komıssııasynyń otyrysyna jınalǵandar aımaqtyń kóktemgi sý tasqyny kezeńine daıyndyq tek maýsymdyq sıpattaǵy jumys emes, aımaq qaýipsizdigine tikeleı qatysty strategııalyq baǵyt ekenin atap ótti. Sol turǵyda ózen arnasyndaǵy gıdrotehnıkalyq qurylystardyń jaǵdaıy, qorǵanys bógetteriniń beriktigi, halyqty ýaqtyly habardar etý júıesiniń daıyndyǵy árkez qatań baqylaýda bolýǵa tıis.
QYZYLORDA
