Foto: Aqorda
Kelissóz barysynda Qasym-Jomart Toqaev Qazaqstan Serbııany Eýropadaǵy mańyzdy strategııalyq seriktes sanaıtynyn aıtty.
«Birqatar baǵytta, ásirese, ekonomıkalyq, mádenı-gýmanıtarlyq salalardaǵy yqpaldastyǵymyzdy nyǵaıtý úshin kóp jumys atqardyq. Astana men Belgrad arasynda tikeleı áýe reısi ashyldy. Saýda qatynastarymyz tabysty damyp keledi. Qazaqstanda 60-tan asa serbııalyq kompanııa jemisti eńbek etip jatyr. Negizgi halyqaralyq máseleler boıynsha ustanymdarymyz ortaq. Sondyqtan eki el arasyndaǵy yntymaqtastyqtyń berik ári tıimdi irgetasy qalandy dep oılaımyn. Sizdiń saparyńyz dostyq qarym-qatynasymyzǵa tyń serpin berý turǵysynan óte mańyzdy ekenine senimdimin», dedi Prezıdent.
О́z kezeginde Aleksandr Výchıch Qazaqstanǵa resmı saparmen kelgenine qýanyshty ekenin jetkizip, qonaqjaılyq tanytqany úshin Qasym-Jomart Toqaevqa rızashylyǵyn bildirdi.
«Sizdiń pikirińizben tolyq kelisemin, elderimiz arasynda shynaıy strategııalyq qarym-qatynas ornaǵan. Sizdiń qoldaýyńyzdyń arqasynda saýda-ekonomıkalyq baılanystarymyz joǵary qarqynmen damyp keledi. Aldaǵy ýaqytta jasandy ıntellekt, aqparattyq tehnologııalar men energetıka salalarynda yqpaldastyq ornatý arqyly dostyǵymyz jańa deńgeıge kóteriledi dep oılaımyn. Sizdi jaqyn arada elimizde qarsy alýǵa daıynbyz», dedi Aleksandr Výchıch.
