Ǵylym jáne joǵary bilim mınıstrliginiń taratqan aqparatyna súıensek, elimizdiń bul bastamaǵa qosylýy jasandy ıntellektiniń «ChatGPT Edu» dep atalatyn bilim berýge arnalǵan arnaıy nusqasyn ulttyq bilim salasyna júıeli túrde engizýdiń bastalǵanyn bildiredi. Qazaqstan atalǵan halyqaralyq baǵdarlamaǵa qatysqan Ortalyq Azııadaǵy alǵashqy memleket atanyp otyr. «Edu for Countries» baǵdarlamasyna qatysý elimizdiń bilim saıasaty úshin strategııalyq mańyzǵa ıe. Jasandy ıntellektiniń oqytý úderisine yqpaly jónindegi jahandyq pikirtalasta Qazaqstan jasandy ıntellekt pedagogti almastyrmaıtynyn, kerisinshe onyń kásibı múmkindigin kúsheıtetinin basshylyqqa alady. Osy rette «ChatGPT Edu» júıesin qoldaný pedagogterdiń ákimshilik jáne ádistemelik júktemesin azaıtýǵa, sondaı-aq sapaly ári jekelendirilgen oqytýǵa qolaıly jaǵdaı jasaýǵa baǵyttalǵan.
Joba byltyr qarasha aıynda Memleket basshysynyń AQSh-qa jasaǵan resmı sapary barysynda qol qoıylǵan yntymaqtastyq týraly memorandým aıasyndaǵy kelisimder negizinde iske asady. Negizgi kelisim «OpenAI, Inc.», «Freedom Holding Corp.» jáne óńirlik seriktes «Bilim Group» arasynda jasaldy. Joba memlekettik bıýdjet nemese syrtqy granttar tartylmaı, jeke qarajat esebinen júrgizilmek.
Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev elimizdiń «Edu for Countries» baǵdarlamasynyń alǵashqy halyqaralyq legine qosylýy Jasandy ıntellekt jáne sıfrlandyrý jylymen tuspa-tus kelip, bul bizdiń jasandy ıntellektini negizgi salalarǵa júıeli túrde engizýge baǵyttalǵan ustanymymyzdy kórsetetinin aıtady.
Al Ǵylym jáne joǵary bilim mınıstri Saıasat Nurbek: «Biz OpenAI» kompanııasymen áriptestikti bolashaq bilim berý modeliniń negizin qalaıtyn biregeı joba retinde qarastyramyz, al «ChatGPT Edu»-di oqytýshy men zertteýshiniń múmkindikterin almastyrmaıtyn, kerisinshe keńeıtetin keshendi sheshim dep bilemiz. Jasandy ıntellekt – adamdy almastyratyn qural emes, synı oılaý men ony qoldaný mádenıeti qalyptasqan jaǵdaıda oılaý qabiletin kúsheıtetin qural. Bilim men ǵylym salasynda JI oqý materıaldaryn ázirleýdi jedeldetýge, stýdenttermen keri baılanystyń sapasyn arttyrýǵa jáne zertteý jumystary úshin jańa múmkindikter ashýǵa jol ashady», dedi.
«ChatGPT Edu» pedagogterge oqý materıaldaryn, tapsyrmalar men testterdi daıyndaýǵa, kontentti bilim alýshylardyń deńgeıine beıimdeýge, sondaı-aq qazaq, orys jáne aǵylshyn tilderinde oqý materıaldaryn ázirleýge jaǵdaı jasaıdy. Jumystardy tekserý barysynda júıe baǵalaý krıterıılerin qalyptastyrýǵa jáne keri baılanys ázirleýge qoldanylýy múmkin, alaıda baǵalaýǵa qatysty barlyq sheshim tolyqtaı oqytýshynyń quzyretinde qalady.
Osyǵan qatysty Oqý-aǵartý mınıstri Juldyz Súleımenova jasandy ıntellektini bilim júıesine engizýdi pedagogterdiń rólin kúsheıtýge baǵyttalǵan strategııalyq qadam retinde qarastyratynyn jetkizdi.
«Jasandy ıntellekt pedagogke tán emes birqatar mindetti óz moınyna alyp, onyń senimdi kómekshisine aınalady. «ChatGPT Edu» sekildi quraldar pedagogterdiń zııatkerlik seriktesine aınalyp, olardyń múmkindikterin keńeıtedi. Sondaı-aq ár bilim alýshyǵa jeke tásildi kúsheıtedi. JI – daıyn jaýaptardyń kózi emes, oılaý, jaýapkershilik jáne sıfrlyq mádenıetti damytýǵa arnalǵan resýrs. Ol ártúrli daıyndyq deńgeıindegi oqýshylarǵa arnalǵan saralanǵan oqý materıalyn jedel ázirleýge, keri baılanystyń tıimdiligin arttyrýǵa jáne bilim alýshylardyń zamanaýı tehnologııalarmen jumys isteý daǵdylaryn qalyptastyrýǵa kómektesedi», dedi ol.
Osy qańtar aıynan «OpenAI» mamandarymen birlesip, «ChatGPT Edu» júıesin bilim berý, ákimshilik jáne ǵylymı zertteý qyzmetinde praktıkalyq turǵyda qoldaný boıynsha paıdalanýshylardy turaqty oqytýdy uıymdastyrý bastaldy. Bul jasandy ıntellektini qoldanýda biryńǵaı tásilderdi qalyptastyryp, pedagogterdiń sıfrlyq ári AI-saýattylyǵyn arttyrýǵa múmkindik beredi.
