Sýret: facebook.com/railways.kz
Keshtiń eń áserli sátteriniń biri – osy bilim ordasynyń burynǵy dırektory, ardager ustaz Nysanbaeva Batıma Qalpıevnany erekshe qurmetpen qarsy alý boldy. Jınalǵan qaýym onyń sanaly ǵumyryn bilim salasyna arnaǵan eńbegin rızashylyqpen eske alyp, ómirlik tájirıbesi men ónegeli jolyn iltıpatpen atap ótti. Ardager ustazǵa kórsetilgen qurmet zaldaǵy barsha jannyń júregine jylylyq syılady.
Merekelik keshke arnaıy shaqyrylǵan Qarasaı aýdandyq bilim bóliminiń basshysy men aýdan mektepteriniń dırektorlary da sharany zor yqylaspen tamashalap, ujymnyń uıymshyldyǵyna rızashylyqtaryn bildirdi.
Kesh barysynda Qarasaı aýdandyq bilim bóliminiń basshysy Asel Ableevna birqatar ustazdy Qurmet gramotasymen marapattap, olardyń ustazdyq joldaǵy qajyrly eńbegin joǵary baǵalady. Al Batıma Qalpıevna jınalǵan qaýymǵa júrekjardy alǵysyn aıtyp, aq batasyn berdi.
Merekelik keshti №2 mekteptiń oqýshylary ásem ánmen, myń buralǵan bımen jáne áserli qoıylymdarymen kóriktendirdi. Árbir óner nómiri kórermenderge erekshe kóńil kúı syılap, zaldy shattyq pen qol shapalaqqa bóledi.
Sonymen qatar Qarasaı aýdandyq bilim bóliminiń sektor meńgerýshisi Baǵlan Qanatovna kásipodaq atynan merekelik quttyqtaýyn jetkizip, bilim salasyna eńbegi sińgen ustazdardy Alǵys hattarmen marapattady.
Kesh sońynda №2 mektep dırektory Jumabekov Samat Súıimbekuly qonaqtardy kóktemniń shýaqty merekesimen quttyqtap, ujymǵa qoldaý bildirgen áriptesterine shynaıy rızashylyǵyn jetkizdi. Merekelik kesh qatysýshylardyń júreginde uzaq saqtalatyn jyly áser qaldyrdy.
