«Bizdiń osy joldaǵy basty muratymyz – bilim men tárbıeni qatar berip, sanaly urpaq qalyptastyrý», deıdi Juldyzaı Musaeva. Bálkim, sodan da shyǵar jyl saıyn ulttyq biryńǵaı testileýden eń joǵary 140, 139 ball alatyn oqýshylardyń deni – osy kompanııanyń túlekteri.
Bir qyzyǵy, keıipkerimizdiń ózi 2015 jyly testileý tapsyrǵanda nátıjesi jaman bolmaǵan. Biraq grantqa bir baly jetpeı qalypty. Ýnıversıtettiń alǵashqy kýrstaryn aqyly negizde oqyǵanymen, 3-kýrsta grantqa aýysqan. Árıne, onyń qadirin grantqa bir baly jetpegen talapker ǵana shyn túsinedi. Bul sezim olımpıadada tórtinshi oryn alǵan sportshynyń kúıindeı shyǵar, bálkim. Muny jaqsy biletin Juldyzaı oqýǵa túsýge bir baly jetpegen oqýshylarǵa jyl saıyn óz atynan grant taǵaıyndap keledi. Osy kúnge deıin ol bergen 34 grant 34 oqýshynyń sóngeli turǵan úmitin qaıta jaqty.
Juldyzaıdyń jas ta bolsa eki jarym myńnan astam mamandy jumyspen qamtyp, dál qazir qyryq myńǵa jýyq oqýshyny testileýge daıyndap otyrǵan aýqymdy jobanyń tetigin ustaýy – úlken jaýapkershilik. Bul – qur statıstıka emes, ár sannyń artynda myńdaǵan otbasynyń úmiti turǵanyn kórsetetin naqty fakt. El damýyna eshqandaı dabyrasyz, únsiz ǵana úles qosyp júrgen Juldyzaı sekildi jigerli hám jasampaz jastar qashanda úlgi.
Paıdasy kópke tıgen jobanyń júıesi de myqty bolsa kerek. Ujymnyń basym bóligi jastardan quralǵan. Kópshiligi bir kezderi osy jobada ózi de oqyp, keıin sol ortaǵa qyzmet etýdi tańdaǵan. Sondyqtan olar talapkerdiń kóńil kúıin, qarqynyn, qaı taqyrypta qınalatynyn jaqsy biledi.
«Darynsyz shákirt bolmaıdy, daryndy asha almaıtyn muǵalim bolady. Balaǵa senim artyp, shyraǵyn jaǵa bilýimiz kerek. Bizdiń onlaın júıede qyzmet etýimiz de oqýshynyń áleýetin tolyq ashýǵa baǵyttalǵan. Birinshiden, bul talapkerdiń ýaqytyn únemdeıdi. Jolǵa ketetin ýaqyt qysqarǵan soń, oqýshy apta saıyn qosymsha 3-6 saǵatty daıyndyqqa arnaı alady. Ekinshiden, nátıje kózden tasa qalmaıdy. Ár testileýden keıin júıe qaı jerde qate ketkenin, qansha ýaqyt jumsaǵanyn, qaı taqyryptyń álsiz ekenin ózdiginen shyǵaryp beredi. Úshinshiden, oqý materıaly árdaıym qoljetimdi. Beınejazba, teorııa, tapsyrma táýlik boıy ashyq turady, bala qajet bolsa bir bólimdi qaıta-qaıta qarap, bekite beredi. Eń qundy artyqshylyqtyń biri – geografııalyq shekteý de joıylady. Maǵan bul óte mańyzdy, óıtkeni myqty muǵalimniń sabaǵyna tek qaladaǵy bala ǵana emes, eldiń kez kelgen óńirindegi talapker de qol jetkize alýǵa tıis. Bul aýyl men qala arasyndaǵy bilim alshaqtyǵyn azaıtýǵa qyzmet etedi», deıdi ol.
Kompanııanyń aldaǵy kóp josparynyń biri – 9-10 synyp oqýshylaryna arnalǵan JUZ40 olımpıadasyn ótkizý. Mundaǵy maqsat UBT-ǵa jaqyndaǵanda ǵana qamshy baspaı, balanyń qabiletin erterek baıqap, olardyń baǵytyn der kezinde aıqyndaýǵa kómektesý.
«Eger bilim berý tek baǵdarlama men tapsyrmadan tursa, ol jaı ǵana pán bolyp qalar edi. Al balaǵa eń aldymen qoldaý qajet. Bizge oqýshylar kóbine mektepte nemese úıde taba almaǵan qoldaý úshin keledi. Olar kýratorlarmen ashyq sóılesip, óz qıyndyqtaryn jasyrmaı jetkize alady. Sondyqtan biz úshin eń mańyzdysy – tek bilim berý emes, oqýshynyń janynda bolyp, ony túsine bilý», deıdi Juldyzaı Musaeva.
