Foto: gov.kz
Erlan Jetibaevtyń aıtýynsha, Syrtqy ister mınıstriniń buǵan deıingi eskertýlerine qaramastan keıbir azamattar óńir elderine saparyn jalǵastyrýdy josparlaǵan.
Sondyqtan vedomstvo Taıaý Shyǵysta áskerı is-qımyldardyń jalǵasýyna jáne birqatar elde áýe keńistiginiń jabylýyna baılanysty azamattarǵa jaǵdaı tolyq turaqtanǵanǵa deıin Bahreın, Mysyr, Izraıl, Iemen, Iordanııa, Iran, Qatar, Saýd Arabııasy, Túrkııa, Lıvan, Birikken Arab Ámirlikteri, Oman jáne Sırııa syndy elderge barýdan bas tartýdy usynyp otyr.
Sondaı-aq mınıstrliktiń resmı ókili Taıaý Shyǵysta júrgen el azamattaryna myna erejelerdi qatań saqtaýdy eskertti:
- jeke qaýipsizdik sharalaryn kúsheıtý;
- qaýipti aımaqtarǵa barmaý;
- jergilikti bılik organdarynyń nusqaýlaryn oryndaý;
- zymyran soqqysyna qatysty qaýip týyndaǵan jaǵdaıda dereý baspanalarǵa nemese panalaý oryndaryna barý;
- Qazaqstannyń sheteldegi dıplomatııalyq mekemeleri, týroperatorlar jáne áýe tasymaldaýshylarymen turaqty baılanysta bolý.
Aıta keteıik, evakýasııa jumystary bastalǵaly beri Taıaý Shyǵys elderinen 8 585 Qazaqstan azamaty elge qaıtaryldy.
Eske sala keteıik, Izraıl 28 aqpanda tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Búǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
Al qazir elimizdiń Syrtqy ister mınıstrligi Taıaý Shyǵys elderinen azamattarymyzdy evakýasııalaý jumysyn belsendi atqaryp jatyr.
