Foto: stan.kz
Saladaǵy qomaqty tabys 2022 jyly tirkelgen. Sol kezde qumar oıyndaryndaǵy qyzmet kólemi – 553,7 mlrd teńgege deıin jetip, bir jyldyń ishinde 7,5 esege artqan. 2023-2025 jyldary belgili bir qubylmalylyq baıqalǵanymen, naryq jyl saıyn shamamen 470-480 mlrd teńge deńgeıinde turaqtaǵan. Bul on jyl burynǵy kórsetkishten 20 ese kóp ekeni belgili bolyp otyr.
finprom.kz zertteýinshe, sońǵy jyldary naryq qurylymy da túbegeıli ózgergen. Buryn negizgi róldi orta jáne iri operatorlar atqarsa, 2025 jylǵa qaraı naryq kóleminiń 82%-yn, ıaǵnı 388,3 mlrd teńgeni shaǵyn kásiporyndar qamtamasyz etken. Al 2019 jyly shaǵyn kásiporyndardyń úlesi nebári 11,5% nemese 1,5 mlrd teńge ǵana bolǵan.
116 mln teńge men ZEEKR kóligi tárkilendi: Almatyda qumar oıyndaryn uıymdastyrǵandarǵa úkim shyqty
Máseleniń aýqymy tek kompanııalardyń qarjylyq esepterimen ǵana emes, áleýmettik statıstıkamen de aıqyndalady. Qarjy vıse-mınıstri Erjan Birjanovtyń aıtýynsha, shamamen 700 myń Qazaqstan azamaty turaqty túrde bás tigedi.
Sonymen qatar Qarjy naryǵyn retteý jáne damytý agenttigi qumar oıyndarǵa belsendi qatysý ekinshi deńgeıli bankterden nesıe alý múmkindigine áser etýi múmkin ekenin atap ótti. Eger býkmekerlik shottarǵa turaqty aýdarymdar baıqalsa, bank qaryz alýshynyń qarjylyq júktemesin baǵalaý kezinde ony esepke alýy múmkin.
Sheteldik kompanııalar naryqtyń aıtarlyqtaı úlesin áli de qamtyp otyr. 2024 jyly olardyń úlesine – 296,2 mlrd teńge tıesili boldy. 2025 jyly bul kórsetkish – 217,2 mlrd teńgege deıin azaıǵanymen, kapıtal halyqaralyq bás tigý platformalary arqyly elden áli de belsendi túrde shyǵyp jatyr.
Resmı tirkelgen 700 myń belsendi oıynshy máseleniń tek kózge kórinetin bóligi ǵana. Bul – zańdy, lısenzııasy bar operatorlarmen jumys isteıtin adamdar. Al, shyn máninde báske beıim aýdıtorııa áldeqaıda keń. Salada zańdy naryqpen qatar «kóleńkeli» segment te qarqyndy ósip keledi. Lısenzııasy joq býkmekerlik keńseler men sheteldik ıýrısdıksııalarda tirkelgen onlaın-kazınolar Qazaqstannyń quqyqtyq keńistiginen tys jumys isteıdi jáne salyq tólemeıdi, oıynshylardy qorǵaý talaptaryn saqtamaıdy.
Olar qyzmetin bloger, ınflıýenserler arqyly jarnamalaıdy. Jeke usynys tasasyna jasyrylǵan qumar oıyn jarnamasy Instagram, TikTok jáne Telegram platformalary arqyly mıllıondaǵan qoldanýshylardy qamtyp otyr. Mundaı format ońaı aqsha tabý ıllıýzııasyn qalyptastyryp, ásirese 30 jasqa deıingi jastarǵa qatty áser etedi. Áleýmettanýshylardyń dereginshe, oıynǵa táýeldi adamdardyń basym bóligi dál osy jas sanatyna jatady.
Elimizde blogerlerge qumar oıyndardy jarnamalaýǵa zań júzinde tyıym salynǵan, al zań buzýshylar jaýapkershilikke tartylýy múmkin. Alaıda bul shekteýdi aınalyp ótý ońaı bolyp otyr. Mundaı jarnamanyń negizgi bóligi Reseı men TMD-nyń basqa elderindegi blogerler arqyly taralady, al olarǵa Qazaqstan zańnamasy júrmeıdi. Olardyń kontentin qazaqstandyq aýdıtorııa esh kedergisiz tutynady, al lısenzııasy joq platformalar jergilikti zańdardyń eshqaısysyn buzbaı-aq jańa oıynshylarǵa ıe bolady.
Jarnamany qatań retteý, lısenzııasy joq platformalardy buǵattaý jáne oıynǵa táýeldi adamdarǵa naqty qoldaý kórsetý sııaqty keshendi sharalar qabyldanbasa, 700 myń oıynshy degen kórsetkish aldaǵy ýaqytta odan ári óse berýi múmkin.
