Túrkııanyń tótenshe jaǵdaılar jáne apattar basqarmasynyń (AFAD) málimetinshe, jerasty dúmpýleri Tokat provınsııasyndaǵy Nıksar qalasy mańynda 6,37 shaqyrym tereńdikte bolǵan. Jer silkinisi Amasııa, Sıvas jáne Samsýn qalalarynda da sezilgen.
Tokat provınsııasynyń gýbernatory Abdýllah Kıoklıý aımaqta aıtarlyqtaı qıraý tirkelmegenin málimdedi.
«Keıbir mektepterdiń qabyrǵasynda sylaq jaryqtary paıda boldy, keı jerlerde bolmashy zaqym bar. Aýmaqqa tolyq tekserý júrgizemiz. Keıbir turǵyndar men jataqhanadaǵy stýdentter úreıden aýrýhanaǵa júgindi. Budan basqa alańdatatyn jaǵdaı tirkelgen joq», dedi Abdýllah Kıoklıý.
Jer silkinisi kezinde aýyl turǵyndary qoryqqannan úılerinen shyǵyp, kóshege júgirgen.
Qaýipsizdik maqsatynda Tokat provınsııasynda barlyq memlekettik jáne jekemenshik mekemelerdiń jumysy ýaqytsha toqtatyldy. Sonyń ishinde mektepter, balabaqshalar, arnaıy bilim berý jáne ońaltý ortalyqtary bir kúnge jabyldy.
