Ekspozısııa sýretshiniń san qyrly shyǵarmashylyq jolyn aıshyqtaıdy. Avtor úshin óner – únemi alǵa umtylý, formanyń kemeldigi men mazmun tereńdigin úılestirý jolyndaǵy úzdiksiz izdenis dersiz. Avtor shyǵarmashylyq ǵumyrynda batyl eksperıment jasap, janrlyq jáne stıldik shekaralardy keńeıtip keledi.
Kórmede músindik jáne sáýlettik jobalar, keskindeme men grafıka týyndylary, dızaın, sıfrlyq óner jáne kórkem fotosýret salasyndaǵy eńbekter usynylǵan. Árbir jumys avtordyń materıaldy seziný ereksheligin, plastıkalyq oılaý júıesin jáne kásibı sheberligin tanytady.
Sýretshi úshin «qolóner» uǵymy tek tehnıkalyq mashyq emes, ol – dástúr men jańashyldyqty, ulttyq kórkemdik kodtar men zamanaýı álemdik úrdisterdi toǵystyratyn shyǵarmashylyq fılosofııa.
Kórme qazaqstandyq sýretshilerdiń ulttyq beıneleý ónerin damytýdaǵy eleýli úlesin aıqyndaıdy. Tereń akademııalyq mektepten ótken, mol tájirıbe jınaqtaǵan otandyq sheberler eldiń mádenı keńistigin qalyptastyrýda mańyzdy ról atqaryp keledi.
«Bul kórme jas urpaq úshin de taǵylymdy. Mýzeıdiń basty mindeti – kórkem murany saqtaý jáne kórsetý ǵana emes, mádenı sabaqtastyqty nyǵaıtý, Qazaqstannyń kórnekti sýretshileriniń esimderin keńinen nasıhattaý arqyly bolashaq býynǵa kásibı ári rýhanı úlgi kórsetý», deıdi kórmeni uıymdastyrýshylar.
Kórmeniń ashylý saltanatyna sýretshiniń áriptesteri men zamandastary Nellı Býbe, Marat Turǵymbaı, Marlan Nysanbaev, Maqsat Qańtarbaev, Esenǵalı Sadyrbaev, Djamılıa Taken, Shoqan Tólesh, Estaı Daýbaev, Fatıma Tarazı jáne basqa da óner qaıratkerleri qatysty. Jınalǵandar «Qolóner tarıhy» retrospektıvasy – shyǵarmashylyqtyń aralyq qorytyndysy ǵana emes, zamanaýı qazaqstandyq óner keńistiginde ózindik orny bar sheberdiń úzdiksiz kórkemdik evolıýsııasynyń aıqyn kórinisi ekenin atap ótti.
