Osyndaı mamandardyń biri – Allur zaýytynyń kýzovty boıaý sehyndaǵy boıaýshy-óńdeýshi Kámshat Tileýova. Ol Qostanaıǵa Aqtaý qalasynan qonys aýdarǵan.
Kámshattyń zaýyttaǵy joly stýdent kezinen bastalǵan. Ol Satbayev University ýnıversıtetimen seriktestik baǵdarlamasy aıasynda tájirıbeden ótý úshin kásiporynǵa kelgen. О́ndiristik tájirıbeden ótetin stýdentterge jatyn oryn men tamaq usynylyp, sonymen qatar jalaqy da tólenedi. Allur zaýytynyń bazasynda mashına jasaý jáne avtomobıl jasaý salalary boıynsha alty bazalyq kafedra jumys isteıdi jáne 18 bilim berý baǵdarlamasy ázirlengen.
Kámshattyń óndiristik tájirıbesi 2024 jyldyń qyrkúıeginen 2025 jyldyń mamyryna deıin jalǵasty.
«Bizdi Almatydan tájirıbeden ótýge jiberdi. Árqaısymyz túrli sehtarda jumys istedik: kóptegen stýdentter Kia óndiris jelisinde boldy, al men kýzovty boıaý sehynda tájirıbeden óttim. Tájirıbeden keıin dıplomymdy qorǵaý úshin Almatyǵa bardym. Biraq biraz ýaqyttan soń Qostanaıǵa qaıta oralýdy jón kórdim», deıdi Kámshat.
Dıplomyn qorǵaǵannan keıin ol polırovka ýchaskesindegi bos oryn týraly estip, óz kúshin synap kórýge sheshim qabyldaıdy. Jańa qalaǵa kóshý ońaı sheshim bolmaǵanyn jasyrmaıdy.
«Buǵan eki sebep áser etti. Birinshiden, ujym. Áriptesterimmen jaqyn aralasyp kettim, bári maǵan jyly qarym-qatynas tanytty. Ekinshiden, qalanyń ózi. Qostanaı tabıǵatymen, aýa raıymen, adamdarymen unady. Zaýytta jas mamandarǵa damý úshin kóptegen múmkindik beriledi. Árıne, bastapqyda qolymnan kele me degen kúmán boldy. Biraq dostarymmen, áriptesterimmen sóıleskennen keıin bul sheshimimniń durys ekenin túsindim», deıdi ol.
Qazir Kámshat kýzovty boıaý sehynda boıaýshy bolyp jumys isteıdi. Onyń negizgi mindeti – avtomobıl kýzovtaryn kelesi qurastyrý kezeńine jiberer aldynda minsiz kúıge jetkizý. Kámshattyń aıtýynsha, jumysta áriptesterdiń qoldaýy erekshe mańyzdy.
«Men ártúrli jastaǵy adamdarmen til tabysýdy, komandada jumys isteýdi jáne óz isime jaýapkershilikpen qaraýdy úırendim. Biz árqashan bir-birimizge kómektesemiz. Qazir ózimdi tolyqqandy maman retinde sezinemin jáne zaýyttyń, jalpy salanyń damýyna óz úlesimdi qosyp júrgenimdi túsinemin», deıdi ol.
Allur kompanııasy birneshe jyldan beri elimizdiń jetekshi ýnıversıtetteri men beıindi kolledjderinde dýaldy bilim berý baǵdarlamasyn damytyp keledi. Kóptegen stýdentter zaýytta tájirıbeden ótkennen keıin osy kásiporynda jumysyn jalǵastyrǵysy keledi.
Alaıda Qostanaı tek jas mamandardy ǵana emes, tájirıbeli kásibı kadrlardy da ózine tartyp otyr. Solardyń biri – jetkizýshiler sapasyn basqarý bóliminiń basshysy Áset Súgralıev. Ol Qostanaıǵa Oral qalasynan kóship kelgen.
«Sol kezeńde men avtokólik ónerkásibine aýysý múmkindigin qarastyryp júrgen edim. Allur kompanııasyndaǵy bos oryndy kórgende, óz tájirıbemniń bul kásiporynǵa paıdaly bolatynyn túsindim. Sondyqtan birden kompanııa ókilderimen baılanysqa shyqtym», deıdi Áset.
Buǵan deıin ol Oralda, Almatyda, Qazanda jáne Astanada jumys istegen. Onyń aıtýynsha, qala aýystyrý – kásibı damýdyń tabıǵı bir bóligi.
Qazir Áset óndiris jelisine jetkiziletin komponentterdiń sapasyn aldyn ala baqylaýǵa jaýapty baǵytty basqarady.
«Bizdiń mindetimiz – jetkizýshilermen júıeli jumys júrgizip, komponentterdiń turaqty sapasyn qamtamasyz etý», deıdi ol.
Búginde Kámshat pen Áset sekildi mamandardyń eńbek joly elimizdiń jańa ındýstrııalyq kartasyn qalyptastyryp keledi. Túrli qaladan jáne ártúrli kásibı tájirıbemen kelgen adamdar Qostanaıǵa jınalyp, Qazaqstandaǵy eń iri avtokólik zaýyttarynyń birinde eńbek etip júr. Olardyń kásibıligi, damý jolyndaǵy talpynysy men komandalyq rýhynyń arqasynda Allur strategııalyq mańyzy bar kásiporyn retindegi mártebesin nyǵaıtyp, al Qostanaı búkil el boıynsha mamandardy ózine tartatyn ortalyqqa aınalyp otyr.
Qurmanbek DIHANBAEV
