Indıan-Ýells qalasynda ótip jatqan WTA-1000 sanatyndaǵy bedeldi hard týrnırinde qazaqstandyq tennısshi serbııalyq Aleksandra Krýnıchpen jup qurap óner kórsetip jatyr. Olardyń dýeti jarysta besinshi nómirmen tirkelgen.
Jartylaı fınaldyq kezdesýde Danılına men Krýnıch jetinshi nómirmen tirkelgen ıspanııalyq Krıstına Býksha men amerıkalyq Nıkol Melıkar-Martınes jubyn senimdi túrde jeńdi. Match eki sette – 6:3, 6:4 esebimen aıaqtaldy.
Kezdesý 1 saǵat 19 mınýtqa sozyldy. Osy ýaqyt ishinde qazaqstandyq-serbııalyq jup úsh eıs jasap, bir qos qatelik jiberdi jáne 13 breık-poınttyń tórteýin tıimdi paıdalandy.
Fınalda Anna Danılına men Aleksandra Krýnıch chehııalyq Katerına Sınıakova jáne amerıkalyq Teılor Taýnsend jubymen kezdesedi. Úshinshi nómirmen tirkelgen bul dýetke qarsy sheshýshi match 14 naýryzǵa josparlanǵan.
Indıan-Ýellstegi sátti óneriniń arqasynda Anna Danılına juptyq razrıadtaǵy álemdik reıtıngte tórtinshi orynǵa kóteriledi. Bul – tennısshiniń karerasyndaǵy eń úzdik nátıje bolmaq.
