Kórisý kúni dep atap ketken mereke Mańǵystaýdan bastalyp, búginde tutas el kóleminde toılanyp júr. Qystyń qursaýynan qutylyp, jylǵa aman jetken aǵaıyn jadyraı kórisetin 14 naýryz – kıiz úıler tigilip, altybaqan qurylyp, ulttyq dástúr men ónerdiń saltanat quratyn kúni.
Mańǵystaýda Amal merekesi keıingi jyldary turaqty túrde Otpan taý bıigindegi tarıhı-mádenı keshende toılanyp keledi. О́ńirlik Qoǵamdyq kommýnıkasııa ortalyǵynyń habarlaýynsha, Mańǵystaýda Amal meıramy bıyl da aıryqsha toılanady.
Eki kúnge josparlanǵan merekelik baǵdarlama ulttyq rýh pen salt-dástúrdi dáripteýge baǵyttalǵan mazmundy is-sharalarǵa ulasady. Atap aıtqanda, qazaq kúresi, kir tasyn kóterý, qol kúresi, arqan tartý syndy ulttyq sport túrlerinen jarystar ótedi. Sonymen qatar jyr-terme keshi, qolóner kórme-jármeńkesi, analar sherýi jáne konserttik baǵdarlamalar uıymdastyrylady.
Amal kúni Otpan taýda ótetin dástúrli is-sharanyń biri – «Birlik» otyn jaǵý rásimi. Uıymdastyrýshylardyń aıtýynsha, bul rásim jaýgershilik kezinde Mańǵystaýdyń oıy men qyryn jaılaǵan qazaq qolyn biriktirý úshin Otpannyń bıiginen jaǵylǵan uran ot qurmetine jáne sheıitter rýhyna baǵyshtalǵan, búginde halyqtyń birligi men urpaq sabaqtastyǵyn beıneleıtin belgi bolyp tabylady.
Dástúrge saı at sporty da merekeniń basty kórkine aınalady. 7 shaqyrymdyq qunan báıge, 12 shaqyrymdyq top báıge men 18 shaqyrymdyq alaman báıge jarystary ótedi.
«Amal – tatýlyq pen birlik merekesi» atty merekelik baǵdarlama aıasynda jergilikti ónerpazdarmen qatar, shetelden arnaıy shaqyrtylǵan dástúrli óner ókilderi kórermenge túrki halyqtarynyń ulttyq mýzykasy men baı mádenı murasyn usynady. Olardyń qatarynda ózbek halyq ánderin oryndaýda sheberligimen tanymal О́zbekstan memlekettik fılarmonııasynyń ánshisi Dılfýza Qabyleva, Qyrǵyz Respýblıkasynyń belgili ánshisi, T.Satylǵanov atyndaǵy Qyrǵyz memlekettik fılarmonııasynyń solısi Janar Týratova, Ázerbaıjan Respýblıkasynan kelgen dástúrli ánshi, «Vatan Musik Group» ansambliniń vokalısi, ázerbaıjan halyq mýzykasyn jańa stılde nasıhattap júrgen ónerpaz Sefalı Mırzelıev, Túrkııa Mádenıet jáne týrızm mınıstrliginiń Beıneleý óneri bas basqarmasyna qarasty Ankara memlekettik túrik halyq mýzykasy horynyń vokalısi Nılgıýn Kızılchı bar.
Kórisý kúnin toılaý tek Otpan taýmen shektelmeıdi. Ádemi keshter men kórinister árbir aýdan, qalalarda, kósheler men alańdarda, mádenıet mekemeleri men bilim oshaqtarynda jáne árbir otbasynda úlken merekege aınalady.
Amal – birlik pen meıirimniń, tabıǵat pen tarıhtyń ómirsheń merekesi.
Mańǵystaý oblysy
