520 referendým ýchaskesiniń árqaısysy qajetti jabdyqtarmen: jasyryn daýys berý kabınalarymen, bıýlletenderge arnalǵan jáshiktermen, respýblıkalyq referendýmǵa qatysýǵa quqyǵy bar azamattardyń tizimderimen jáne árbir azamat óz qalaýy boıynsha jańa Konstıtýsııa jobasymen tanysa alatyn aqparattyq stendtermen jabdyqtalǵan.
«О́ńir boıynsha shamamen 500 myńdaı adam daýys berý quqyǵyna ıe. Tizimde 26 myńǵa jýyq múmkindigi shekteýli jan tirkelgen bolsa, olardyń ishinde 3200 adamǵa erekshe jaǵdaılar qajet. Arbaǵa tańylǵandar 305 referendým ýchaskesinde, kórý qabileti nashar daýys berýshiler 365 ýchaskede, al estý qabileti nashar daýys berýshiler 293 ýchaskede daýys bere alady. Ýchaskelerdiń basym bóligi pandýstarmen jabdyqtalyp, arnaıy baǵyttaǵyshtar ornatylǵan. Sondaı-aq kórý qabileti buzylǵan saılaýshylardyń daýys berýge óz betinshe qatysýyna múmkindik beretin Braıl shrıftimen jazylǵan 520 bıýlleten trafareti daıyn tur», deıdi oblystyq aýmaqtyq referendým komıssııasynyń tóraǵasy Gúlnar Amanjolova.
Keı azamattar densaýlyǵyna baılanysty úıden daýys berýdi qalasa, saǵat 12.00-ge deıin tıisti referendým ýchaskesine habarlasyp, ótinish qaldyra alady. Mundaı jaǵdaıda komıssııa ókilderi turǵynnyń úıine bıýlletendi alyp barady. Turaqty tirkeýi joq azamattarǵa Pavlodar, Ekibastuz jáne Aqsý qalalaryndaǵy 6 referendým ýchaskesinde bir kúnge tirkelip, tańdaýyn jasaýǵa múmkindik bar. Búgin atalǵan úsh qaladaǵy qoǵamdyq kólikter jolaýshylardy tegin tasymaldaıdy. Sondaı-aq ınvataksıler tegin qyzmet kórsetedi.
Pavlodar oblysy
