Foto: Dmıtrıı Erofeev
Bul art-nysan Taldyqorǵan qalasyndaǵy kópqóbatty úılerdiń biriniń qabyrǵasynda beınelengen. Muraldyń ashylý saltanaty ótip, oǵan óńir jastary, qoǵam belsendileri, shyǵarmashylyq orta ókilderi jáne qala turǵyndary qatysqan.
«Bizdiń jańa muralymyz Ata zańymyzǵa arnalǵan. Keshe Memleket basshysy atap ótkenindeı, jańa Konstıtýsııa eń aldymen jastarǵa baǵyttalǵan. Ata Zańymyzǵa eriktilik qyzmet, ǵylym, ınnovasııa, jasandy ıntellekt uǵymdary engizilgen. Osyǵan baılanysty biz muraldy zamanaýı múmkindiktermen ushtastyrýǵa tyrystyq. Kórkem týyndyda birlik, ádildik, jaýapkershilik jáne bolashaqqa degen senim ıdeıalary beınelenip, qoǵamdaǵy ózara qurmet pen yntymaqtastyqty dáripteıtin mazmun kórinis tapty. О́ıtkeni Konstıtýsııa – barlyq osy ıgiliktiń bastaýy», dedi «Jetisu jastary» KMM-niń dırektory Shamıl Vankeev.
Mural avtory Ernur Baqbergenniń aıtýynsha, bul jumys qoǵamdaǵy mańyzdy qundylyqtardy zamanaýı óner tili arqyly jetkizýge baǵyttalǵan.
«Mundaı shyǵarmashylyqpen 6 jyldan beri kásibı túrde aınalysyp kelemin. Osy ýaqyt aralyǵynda «Zań men Tártip», «Taza Qazaqstan» sııaqty ıdeologııalyq jáne qoǵamdyq mańyzy bar taqyryptarda birqatar mýraldar saldym. Al osy jobamnyń ereksheligi – muraldyń eskızi jasandy ıntellekt kómegimen ázirlendi. Bul tásil shyǵarmashylyq pen tehnologııany ushtastyra otyryp, zamanaýı ónerdiń jańa baǵyttaryn kórsetýge, sonymen qatar qysqa merzim ishinde júzege asyrýǵa múmkindik beredi. Mysaly, bizdiń shyǵarmashylyq top muraldy 3 kúnniń ishinde tolyq salyp bitti», dedi jas sýretshi.
Aıdos Sarym: Memleket basshysy – jańa Ata zańnyń negizgi avtory
Eske salsaq, buǵan deıin óńir jastarynyń bastamasymen oblystyń aýdan ortalyqtarynda «Taza Qazaqstan», «Adal Azamat», «Zań men Tártip» qaǵıdalaryna arnalǵan úsh mural Kóksý, Qaratal, Sarqan aýdandarynyń ortalyqtarynda salynǵan bolatyn.
