Sýret: kaz.caravan.kz
Referendým kúni «Halyq úni» qozǵalysynyń baıqaýshylary elimizdiń 11 qalasyndaǵy 1 200-den asa saılaý ýchaskesinde monıtorıng júrgizgen. Olar baıqaýdyń aýqymdylyǵy eldiń túrli óńirlerindegi daýys berý barysyn jan-jaqty baǵalaýǵa múmkindik bergenin aıtady. Qozǵalystyń negizgi shtaby Almaty qalasynda ornalasyp, baıqaýshylar jelisi eldiń kóptegen aımaǵyn qamtyǵan.
«Baıqaý mıssııasyna daıyndyq barysynda 11 qalada 2 myńnan asa azamat arnaıy oqytýdan ótti. Baıqaýshylardy oqytýdy qoǵamdyq-saıası úderister salasyndaǵy tanymal sarapshylar – belgili saıasattanýshy Dos Kóshim jáne qoǵam qaıratkeri Beknur Kısıkov iske asyrdy. Oqytý nátıjesinde daıyndyqtan ótken azamattardyń arasynan 1 200 baıqaýshy iriktelip, olar saılaý ýchaskelerinde jumys isteý úshin resmı joldama aldy. Referendým kúni baıqaýshylar tańerteńnen daýys berý aıaqtalǵanǵa deıin ýchas-kelerde jumys istep, azamattyq baqylaýdy tolyq ári júıeli túrde júrgizdi», deıdi «Halyq úni» táýelsiz baqylaýshylar tobynyń jetekshisi Nurbolat Nyshanbaı.
Baıqaýshylardyń baǵalaýynsha, saılaýshylardyń belsendiligi joǵary bolǵan. Ýchaskelik komıssııa músheleri de daýys berý rásimderin uıymdastyrýda qajetti kásibı jáne uıymdastyrýshylyq daıyndyq deńgeıin kórsete bilgen.
Sonymen qatar baıqaý barysynda ártúrli sıpattaǵy 200-den asa zańbuzýshylyq faktisi tirkelgen. Baıqaýshylardyń málimetinshe, olardyń basym bóligi – tehnıkalyq nemese rásimdik sıpattaǵy máseleler.
«Atap aıtqanda, eń jıi kezdesken jaǵdaıdyń biri – birneshe adamnyń bir mezgilde daýys berý kabınalaryna birge kirýi. Bul daýys berý qupııalylyǵy qaǵıdatyna qaıshy. Sonymen qatar keıbir ýchaskelerde baıqaýshylardy tirkeýden bas tartý nemese olardyń qyzmetine nemquraıdy qaraý faktileri tirkelgen. Buǵan qosa saılaýshylar men ýchaskelik komıssııa músheleri arasynda túsinbeýshilikter, jeke kýáliksiz daýys berýge talpynystar jáne ózge de jekelegen rásimdik buzýshylyqtar boldy. Árbir tirkelgen jaǵdaı boıynsha baıqaýshylar tıisti aktiler men hattamalar rásimdep, anyqtalǵan faktilerdi resmı túrde tirkegen. Qazirgi ýaqytta jınalǵan aqparatty júıeleý jáne qosymsha tekserý jumystary jalǵasyp jatyr», deıdi táýelsiz baıqaýshylar tobynyń ókilderi.
Baıqaýshylardyń málimetinshe, jaqyn arada barlyq materıal qorytyndylanyp, ári qaraı talqylaý úshin Ortalyq saılaý komıssııasyna joldanady. Qozǵalys ókilderi anyqtalǵan kemshilikter elektoraldyq úderisterdi jetildirý baǵytyndaǵy konstrýktıvti dıalogke negiz bolady degen senim bildirip otyr.
Sonymen qatar «Halyq úni» toby júrgizilgen baıqaý mıssııasy referendým nátıjelerine kúmán keltirmeıtinin atap ótti. Uıym ókilderiniń aıtýynsha, olardyń negizgi maqsaty – daýys berý úderisin baıqaý, kemshilikterdi anyqtaý jáne olardyń joıylýyna yqpal etý.
Sarapshylar azamattyq baıqaý zamanaýı demokratııanyń mańyzdy elementteriniń biri ekenin atap ótti. Qoǵam ókilderiniń saılaý rásimderin baıqaýǵa belsendi qatysýy memlekettik ınstıtýttarǵa degen senimdi nyǵaıtyp, elektoraldyq mádenıettiń qalyptasýyna yqpal etedi.
«Halyq úni» baqylaýshylar toby júrgizilgen mıssııany Qazaqstandaǵy demokratııalyq ınstıtýttardyń damýyna azamattyq qoǵam tarapynan qosylǵan mańyzdy úles dep baǵalaıtynyn jetkizdi. Uıym ókilderi aldaǵy ýaqytta da Ortalyq saılaý komıssııasy jáne ózge de múddeli taraptarmen yntymaqtastyqty jalǵastyryp, elektoraldyq úderisterdiń ashyqtyǵy men sapasyn arttyrýǵa kúsh salatynyn málimdedi.
ALMATY
