- Maurice-Richard Arena muzaıdynynda álemniń saıypqyran sańlaqtary dodaǵa tústi. Bas bapker Pıotr Gamıdov úkilep qosqan úzdikterimiz irikteý kezeńinde irkilmegenimen, sheshýshi synda júlde oljalaı almady. Erler dodasynda Abzal Ájiǵalıev, Denıs Nıkısha, Ádil Ǵalıahmetov, Nurtilek Qajyǵalı, Aıbek Násen synǵa tússe, áıelder dodasynda Iаna Han, Malıka Ermek, Alına Ájiǵalıeva, Olga Tıhonova aıdynǵa shyqty. Jigitter 5000 metrge estafetalyq saıysqa V tobynda baq synap, ekinshi satyǵa ornyqqanymen, jalpy nátıjede 6-oryndy mise tutty. Qyzdarymyz álem chempıonatynda 8-orynǵa turaqtady. 2000 metrge aralas estafetada 10-oryn buıyrdy. Jekeleı synda Abzal Ájiǵalıev 500 metrde shırek fınalǵa shyqqanymen, óz tobynda úzdikter qatarynan kórine almaı 13-orynǵa turaqtady. Qyzdardan kórsetkishi táýir degen Alına Ájiǵalıeva ǵana, onyń ózi 1000 metrge júgirýde 22-orynnan kórindi. Ońtústik Koreıa short-trekshileri 4 altyn medal ıelenip, kósh bastasa, 2 altyn, 5 kúmis medal buıyrǵan Nıderland quramasy ekinshi satyǵa jaıǵasty. Úshtikti 2 altyn, 1 kúmis medal alǵan Kanada quramasy túıindedi. Sportshylarymyz endi 19-22 naýryz aralyǵynda Astanada ótetin el chempıonatyna qatysady.
- Grýzııanyń Tbılısı qalasynda dzıýdodan Grand Slam týrnıri ótedi. 20-22 naýryz aralyǵyn qamtıtyn dodada 12 balýanymyz beldesýge túsedi. 60 kg salmaqta Maǵjan Shamshadın, Talǵat Orynbasar baq synaıdy. 66 kg salmaqta Nurqanat Serikbaev, Aqyljan Jubatqanov, 73 kg salmaq dárejesinde Ańsarbek Ǵaınýllın, Ánýar Jumageldın el senimin arqalaıdy. 81 kg salmaqta Mádı Amangeldi, Asqar Narqulov tizimde bar. 90 kg salmaqta Baraq Arqabaı, 100 kg salmaqta Baqjan Baıtas, Beıbit Mádıev kúresse, asa aýyr salmaqta (+100 kg) Elaman Erǵalıevke senim artylmaq.
- Otepıa qalasynda (Estonııa) bıatlonnan álem kýboginiń kezeńi máresine jetti. Aralas estafeta saıysynda Vladıslav Kıreev pen Darıa Klımına synǵa túsip, 21-oryndy mise tutty. Aralas komandalar dodasynda Vadım Kýrales, Aleksandr Mýhın, Aısha Raqysheva, Mılana Genevanyń kórsetkishine 23-oryn buıyrdy.
- Taraz qalasynda grek-rım, erkin, áıelder kúresinen 15 jasqa deıingi jasóspirimder men 23 jasqa deıingi jastar arasynda el chempıonaty máresine taıap keledi. «Taraz arena» kesheniniń tórine tóselgen bozkilemde balýandar baryn saldy. Erkin kúresten 15 jasqa deıingi jasóspirimder beldesýinde túrkistandyq Ramazan Ýálıhan chempıon atandy. 38 kg salmaqta beldesken sańlaq altyn medalǵa talasta batysqazaqstandyq Sanjar Sahıpovty súrindirdi. Almaty oblysynyń eki birdeı balýany 41 kg salmaqta fınalǵa shyǵyp, Mıras Ábdikárim jerlesi Baqdáýlet Serikten basym tústi. Astanalyq Bektóre Zamanbek (44 kg) Almaty qalasynyń bal-ýany Nurdáýlet Bekbergendi jyǵyp, el chempıony atandy. Atyraý oblysynyń ulany Ámir Serik (48 kg) fınaldyq beldesýde Abaı oblysynyń sportshysy Arlan Súleımenovten basym tústi. 52 kg salmaq dárejesinde Madııar Ábdikárimov (Almaty obl.) altyn medal úshin ótken tartysta jerlesi Arshyn Elýbekti jeńdi. Beıbarys Túzelbaev (57 kg) shymkenttik Álıhan Alpysty jyqsa, jambyldyq Batyrhan Qaraqystaqbaı (62 kg) Atyraý oblysynyń balýany Nurmuhamed Baýyrjandy súrindirdi. 68 kg salmaqta jambyldyq Naıl Zeınalov qyzylordalyq Aıbar Aıtqalıdan basym tústi. Batysqazaqstandyq Ersultan Súleımen (75 kg) Almaty oblysynyń balýany Ulan Saǵarbekti jeńdi. Astanalyq Sıskıev (85 kg) fınaldyq beldesýde túrkistandyq Ersultan Orazalydan basym tústi. Asa aýyr salmaqta (+85 kg) pavlodarlyq Mıras Shaımerden aqmolalyq Ádilhan Seıdahmetti jeńip, el chempıony atandy. Jasóspirimder arasynda «Qaısar rýh» arnaıy syılyǵy shymkenttik Kóbeı Torǵaýytqa (62 kg) berildi.
