Májilis qaraýyna usynylǵan «Qazaqstan Respýblıkasynyń memlekettik qyzmeti týraly» zań jobasynyń jańa redaksııasy Memleket basshysynyń tapsyrmalaryn iske asyrý aıasynda ázirlengen. Negizgi maqsat – servıstik jáne azamatqa baǵyttalǵan qaǵıdattarǵa súıenetin zamanaýı memlekettik qyzmet modeline kóshý.
Jańa qujatta memlekettik qyzmetshilerge qoıylatyn talaptar naqtylanǵan. Olardyń qatarynda patrıotızm, kásibılik, ashyqtyq, ádeptilik, minsiz bedel, quqyqbuzýshylyqtarǵa jáne múddeler qaqtyǵysyna tózbeýshilik sııaqty qaǵıdattar bar.
Jańa Konstıtýsııa azamattardyń derbes derekterin qalaı qorǵaıdy?
Memlekettik apparatty kásibılendirý úshin birqatar tetikter engizilmek. Atap aıtqanda, tómengi jáne basshylyq laýazymdarǵa kadr daıarlaýǵa arnalǵan arnaıy ınstıtýt qurylady. Tálimgerlik júıesi kúsheıtilip, quqyqbuzýshylyqtardyń aldyn alýǵa baǵyttalǵan jańa qyzmet iske qosylady. Bul qurylym tártiptik komıssııa jumysyn úılestirip, qyzmet ádebiniń saqtalýyn baqylap, memlekettik qyzmetshilerge qatysty shaǵymdardy qaraıdy jáne olardyń múddelerin sotta qorǵaıdy.
Sonymen qatar HR-prosester tolyq sıfrlandyrylmaq. Memlekettik qyzmetke irikteý, bos oryn tańdaý, ótinish berý jáne qyzmetke taǵaıyndaý kezeńderi túgeldeı «E-qyzmet» aqparattyq júıesi arqyly júzege asady. Bul júıe tek memlekettik qyzmetshilerdi ǵana emes, memlekettik zańdy tulǵalardaǵy basqarýshy laýazymdarǵa úmitkerlerdi de qamtıdy.
Zań jobasynda memlekettik qyzmetshilerdiń áleýmettik kepildikterin kúsheıtýge de basymdyq berilgen. Jalaqyny keminde úsh jylda bir ret ındeksteý engiziledi. Sondaı-aq ústeme jumysqa, demalys jáne mereke kúnderindegi eńbekke ótemaqy tóleý qarastyrylǵan. Qyzmet ótili 25 jyldan asqan jáne memlekettik nemese vedomstvolyq nagradalary bar qyzmetshiler zeınetke shyqqanda tórt laýazymdyq jalaqy kóleminde birjolǵy syıaqy alady.
Qyzmettik aýys-túıis kezinde de qoldaý sharalary kúsheıtiledi. Bir eldi mekennen ekinshisine kóshken jaǵdaıda kóterme járdemaqy men múlik tasymalyna ótemaqy tólenedi. Sonymen qatar qyzmetshilerdiń balalary balabaqshaǵa kezeksiz qabyldanady jáne jeńildetilgen turǵyn úı baǵdarlamalaryna qatysý múmkindigi beriledi.
Ádilet mınıstri: 5 derbes konstıtýsııalyq zańdy ázirleý bastaldy
Jalpy, jańa zań jobasy memlekettik qyzmettiń tartymdylyǵyn arttyryp, bilikti kadrlardy tartý men ustap qalýǵa baǵyttalǵan.
