Osy aptada eń aldymen Almaty oblysy boıynsha departamentiniń Aqparattyq qaýipsizdik bólimi «Kóktem-2025» shaqyrylymynyń sarbazdaryn shyǵaryp salý rásimin ótkizdi. Sharada ózderine júktelgen mindetti abyroıly oryndaǵany úshin qatardaǵy jaýyngerler: Erkebulan Meıranbekuly, Ádilbek Kenjeǵul, Jánibek Kárimjan, Abylaıhan Serikbaı jáne Tańnar Dilmurat departament bastyǵynyń mindetin ýaqytsha atqarýshy polkovnık A. Alıevtiń alǵys hatymen marapattaldy. Bólim bastyǵynyń orynbasary leıtenant Azız Osmanov úılerine oralatyn sarbazdarǵa Otan aldyndaǵy adal qyzmetteri úshin alǵys aıtty.
Sonymen qatar mundaı súıinshi jańalyqty Raıymbek aýdany boıynsha shekara basqarmasynyń úıge oralatyn kúndi asyǵa tosyp júrgen sarbazdary da qýana qarsy aldy. Ásirese atalǵan shekara basqarmasyna qarasty «Suńqar» shekara bólimshesiniń sarbazdary osynaý júrekjardy sátti áleýmettik jelilerdiń birine salyp úlgeripti. Munda áskerı kólikke otyrǵan ózderiniń qarýlastarymen qol bulǵap qoshtasyp jatqan shekarashylar kórinedi.
Iá, bul – burynnan kele jatqan dástúr. Áskerden qaıtatyn sát týǵanda sarbazdy aldymen shekara bólimshesiniń bastyǵy sońǵy ret sapqa turǵyzyp, barlyǵymen qol alysyp, qoshtasady. Sosyn, kezek áskerdiń qyzyǵy men qıyndyǵyn birge ótkergen qarýlas dostaryna keledi. Olar dostary mingen kólikti qaqpadan ıterip shyǵarady... Osy sátten bastap, sarbazdar úshin «qarýlas» degen uǵym naǵyz dostyqtyń belgisine aınalady. Tipti, bul bala kezden beri jalǵasyp kele jatqan naǵyz dostyqtan da artyq.
Sonymen, Raıymbek aýdany boıynsha shekara basqarmasynyń ujymy 100-ge tarta sarbazdy úılerine saltanatty jaǵdaıda shyǵaryp saldy. Al Qarasaı aýdany boıynsha shekara basqarmasy bastyǵynyń tárbıe jumystary jónindegi orynbasary podpolkovnık T. Tabyldıevtiń aıtýynsha, alǵashqy bolyp, 24 sarbaz basqarmamen qoshtasqan. Áskerden keıin qyzmetterin kelisimshart shart negizinde jalǵastyrýdy sheshken jeti sarbazǵa buıryq shyǵypty. Taǵy da bir súıinshi jańalyq, úsh sarbaz shekarashy ofıser ataný úshin UQK Shekara akademııasyna oqýǵa túsýge bel býǵan kórinedi. Al týǵan úılerine oralǵan sarbazdar jaýyngerlik daıarlyq qyzmetinde kózge túskeni úshin shekara basqarmasy bastyǵynyń gramotasymen marapattalyp, osyndaı patrıot ul tárbıelegeni úshin olardyń ata-analaryna alǵys hat joldanatyn boldy.
Iá, búgin olardy ata-anasy, týǵan-týystary saǵynyp kútedi. Endi sarbazdar týǵan jerge abyroımen oralyp, alǵan tálim-tárbıesin ómir jolynda jalǵastyrady. Sarbazdardy shyǵaryp salý dástúri – áskerı ómirdiń ajyramas bóligi. Bul – el qorǵaý jolyndaǵy eńbekti baǵalaý, azamattyq boryshty óteýdiń aıqyn kórinisi.
Tamara DÁÝLETBAEVA,
UQK Shekara qyzmeti
Almaty oblysy boıynsha departamentiniń
baspasóz hatshysy
