Qylqalam arqyly aıtylǵan oı men beıne kóbine sózben jetkize almaıtyn tereń maǵynany ashyp, kórermenniń jan dúnıesine áser etedi. «Asia Art» shyǵarmashylyq birlestiginiń bul kórmesi de dál osyndaı rýhanı keńistikti qalyptastyryp, kórermendi óner arqyly týǵan jerdiń bolmysyn jańa qyrynan tanýǵa shaqyrady.
«О́mir juparyn sezinip...» degen ataýynyń ózi – adamnyń tabıǵatpen, týǵan topyraqpen baılanysyn ańǵartatyn poetıkalyq ıshara. Ekspozısııany aralaǵan kórermen beınelerdi ǵana tamashalap qoımaı, dala keńistiginiń tynysyn sezingendeı áserge bólenedi. Sýretshilerdiń týyndylarynda erkindik rýhy, týǵan jerge ińkárlik, ómirdiń máńgilik qozǵalysy sekildi tereń fılosofııalyq taqyryptar kórkem tilmen órnektelgen. Dala jeliniń sybyry, jýsan ańqyǵan keń saharanyń ıisi, asqaq taýlardyń aıbyny – bári de kórme keńistiginde beıneli túrde toǵysyp, kórermendi oı men sezimniń erekshe álemine jeteleıdi.
Ekspozısııa mazmuny jaǵynan elimizdiń kórkem beınesi arqyly jasalǵan rámizdik sapar ispetti. Keskindeme, grafıka jáne músin óneri týyndylarynda ushy-qıyry joq dala keńistigi, asqar taýlar men kógildir kókjıek, ulttyq kıimdegi kóshpelilerdiń áserli beıneleri men kıizdiń tabıǵı jylýy kórinis tabady. Ásirese kóshpeliler mádenıetiniń estetıkalyq kody – oıý-órnek, turmystyq zattar men joralǵylyq qımyldar zamanaýı kórkemdik sheshimdermen ushtasyp, jańa mazmunǵa ıe bolǵan.
Kórmege Astana, Almaty, О́skemen, Kókshetaý, Pavlodar men Taraz qalalarynan kelgen 23 avtordyń týyndylary qoıylǵan. Olardyń qatarynda Irına Orazbekova, Natalıa Býlgakova, Karına Bıtner, Anet Abdý, Alfııa Safı, Elena Panına, Elena Karkavına, Álıma Amangeldi, Arına Zyrıanova, Murat Baıjanov, Olga Jańabaeva, Álıasqar Musaev, Ksenııa Shtyrlova, Sáýle Jumasheva, Janat Koshen, Zarına Nurǵalına, Altynsara Bahı, Elena Fýrsa, Dıana Shaıhıslamova, Alpamys Kenbaev, Sarvar Nakısbekova, Jaras Mamyrbaev, Tımýr Ádilbaevtar bar. Ár sýretshi ózindik qoltańbasymen erekshelenip, qazaq dalasynyń baı jazırasyn túrli kórkemdik tásil arqyly usynady.
Usynylǵan týyndylar stıldik turǵydan da alýan túrli. Kórmede romantızmnen bastap etno-sımvolızmge deıingi baǵyttar toǵysyp, ár avtordyń shyǵarmashylyq izdenisi men dúnıetanymy aıqyn kórinedi. Biri dala keńistigin lırıkalyq náziktikpen beınelese, endi biri ulttyq arhetıpter men sımvoldarǵa tereń mán beredi. Al keıbir jumysta dástúr men zamanaýı kórkem oıdyń sıntezi baıqalady. Munyń barlyǵy qazaq beıneleý ónerindegi jańa izdenister men baǵyttardyń qalyptasyp kele jatqanyn ańǵartady.
Sýretshiler týyndylarynda halyqtyq turmys buıymdary, ulttyq kıim úlgileri, kóshpeli ómirdiń rıtýaldyq elementteri keńinen qoldanylǵan. Osy arqy-ly avtorlar kórkem obraz jasaýmen ǵana shektelmeı, mádenı jadty saqtaýǵa, ulttyq kodty jańasha tanytýǵa umtylady. Árbir kompozısııadaǵy yrǵaq pen plastıkalyq sheshim, tústerdiń úılesimi – qazaq dalasynyń fılosofııasyn sezindirýge baǵyttalǵan kórkem tásilder.
«Asia Art» shyǵarmashylyq birlestiginiń bul jobasy – kásibı sheberliktiń kórinisi ǵana emes, elimizdiń ónerin keńinen nasıhattaýǵa baǵyttalǵan mańyzdy mádenı bastama retinde de mándi. Kórme qonaqtary Shyǵys mádenıetiniń baılyǵy men kórkemdik dástúrin sezinip qana qoımaı, Azııa óneriniń san qyrly bolmysy arqyly jeke rýhanı assosıasııalar álemine saıahat jasaıdy», deıdi ónertanýshylar.
Búgingi jahandaný dáýirinde ulttyq mádenıettiń máni men mańyzy burynǵydan da arta túskeni belgili. Osyndaı kórmeler arqyly kórermen dástúr men zamanaýı ónerdiń ózara sabaqtastyǵyn sezinip, qazaq dalasynyń rýhanı keńistigimen qaıta qaýyshady. «О́mir juparyn sezinip...» kórmesi de – ómir men ónerdiń úndestigin aıshyqtaıtyn, kórermenge týǵan jerdiń sheksiz keńdigin, tabıǵat pen adam arasyndaǵy úılesimdi tereń sezindiretin erekshe mádenı oqıǵa.
ALMATY
