Qýandyq toptan qara úzdi

10 ret

kórsetildi

3 mın

oqý úshin

Semeı qalasynda «Naýryznama» onkúndigi aıasynda áıgili jyraý Jambyl Jabaevtyń 180 jyldyǵyna arnalǵan «Jyr – Jambyl» atty oblystyq aqyndar aıtysy ótti. Qalalyq mádenıet saraıynda ótken sóz barymtaǵy óńirdegi aıtys óneriniń keń órisin taǵy bir márte kórsetti, dep habarlaıdy Egemen.kz.

Baqytbek QADYR

Abaı oblysynyń ákimi Berik Ýálıdiń bastamasymen uıymdastyrylǵan dúbirli dodaǵa óńirdiń aýdan-qalalarynan 10 aıtysker qatysyp, eki aınalym boıynsha baq synasty. Qýanysh Erkinuly, Jasulan Maqaev, Mıras Slamshaıyquly, Qýandyq Kenjebekuly, Manarbek Satybaldy, Aıbek Jeńisqazın, Farhat Maratuly, Erasyl Sársenbaev, Erádil Ereje, Álisher Qydyrbekuly syndy jas jáne tájirıbeli aqyndar sahna tórinde sýyrypsalma saıystyń kórigin qyzdyrdy.

Aıtystyń ádil baǵasyn bergen qazylar quramynda Halyqtyq aqyndar ortalyǵynyń jetekshisi, aqyn Dámetken Omarbaeva, aıtysker aqyndar men jyrshy-termeshilerdiń halyqaralyq odaǵy Abaı oblystyq fılıalynyń tóraǵasy, aqyn Dáýlet Smetov, belgili aıtysker, ádebıettanýshy Qarlyǵash Áýbákirova, Qaırat Sabyrbaev, Ulan Saǵadıev boldy.

Sóz saısynyń bas júldesy – (1 mln teńge) semeılik aıtysker Qýandyq Kenjebekulyna buıyrdy. I oryndy Aıbek Jeńisqazın, II oryndy Manarbek Satybaldy, III oryndy Jasulan Maqaev ıelendi.

Abaı oblysynda 6-synyp oqýshysy smart-sómke oılap tapty

Halyqtyq aqyndar ortalyǵynyń jetekshisi Dámetken Omarbaeva aıtys deńgeıine joǵary baǵa berip, bul jolǵy dodada aqyndardyń daıyndyqpen kelgenin jetkizdi.

«Bul jolǵy aıtysqa qatysqan aqyndardyń daıyndyǵy jaqsy boldy. Taqyrypty ıgerýde, sóz saptaýda jınaqylyq pen oı tereńdigi baıqaldy. Aıtys joǵary deńgeıde ótti dep senimmen aıtýǵa bolady. Ásirese jas aqyndardyń aıaq alysy jaqsy. Bul – óńirdegi aqyndyq mekteptiń áldeqashan qalyptasqanyn, dástúrdiń úzilmeı jalǵasyp kele jatqanyn kórsetedi», deıdi aıtystyń abyz anasy.

Al Aıtysker aqyndar men jyrshy-termeshilerdiń halyqaralyq odaǵy Abaı oblystyq fılıalynyń tóraǵasy Dáýlet Smetov te baıqaýdyń uıymdastyrylýyna nazar aýdardy.

«Sońǵy jyldary oblystyq deńgeıdegi aıtystarǵa mundaı kólemde qarjy bólinýi bolmaǵan. Bul jolǵy júlde qorynyń qomaqty bolýy básekeni kúsheıtti. Aqyndar da soǵan saı jaýapkershilikpen kelip, tartysty aıtys kórsetti. Osyndaı naqty qoldaý bolsa, aıtys óneriniń órisi keńeıip, jańa esimder shyǵary sózsiz. Sondyqtan bul bastama jalǵasyp, dástúrge aınalýy tıis», deıdi Dáýlet Smetov.

Mádenı is-shara sońynda qala ákimi Ádilet Nursaǵatuly jeńimpazdardy quttyqtap, kelesi jyly oblystyq aıtystyń aýqymyn keńeıtip, bas júldege avtokólik tigý múmkin ekenin aıtty.