ASTANA. 13 mamyr. Qazaqstan armııasy álemdik reıtıngte 14 satyǵa kóterildi. Atalǵan tizimdi Global Firepower uıymy jasap shyqty. Tizimde 126 memleket kórsetilgen. Sonyń arasynda Qazaqstan 14 saty joǵary órlep, 66-orynǵa jaıǵasty. Bul týraly tengrinews.kz habarlady.
Zertteýshiler ár eldiń «urys jaǵdaıyndaǵy qýat ındeksin» anyqtaý arqyly osyndaı nátıjege qol jetkizgen. Reıtıngti jasaý barysynda mamandar 50-ge jýyq faktorǵa súıengen. Onyń ishinde jalpy halyqtyń jáne eldi qorǵaýǵa jaramdylardyń sany esepke alynǵan. Qurlyqta, áýede jáne sýda urys júrgize alatyn áskerı tehnıkalarynyń sany da nazardan tys qalmady. Sondaı-aq, ekonomıkalyq resýrstar, munaıdy óndirý jáne eksporttaý boıynsha kórsetkishter jáne eldiń qarýlaný úshin jumsaýy múmkin qarajaty qaperge alynǵan. Reıtıngtiń túzilýine áserin tıgizgen taǵy bir faktor – qatysýshy eldiń geografııalyq ornalasýy. Atalǵan barlyq málimetter ashyq derek kózderinen alynǵanyn aıta keteıik.
Tizimdi jasaýshylardyń pikirinshe, Qazaqstan armııasynyń negizgi kúshin el bıliginiń shet elderden satyp alǵan qarý-jaraqtary quraıdy. Global Firepower-diń málimetine súıensek, Qazaqstan armııasynda 300 tank, 1,6 myń brondalǵan mashına, 744 artıllerııalyq qarý jáne 393 raketa júıesi bar. Sonymen qatar, sońǵy jarty jylda Qazaqstanda ushatyn áskerı apparattardyń sany 233-ke deıin artqan. Olardyń arasynda 100-ge jýyq joıǵysh ushaq (ıstrebıtel) jáne 84 tikushaq bar (onyń ishinde 18-i shtýrmaldy).
Uıymnyń anyqtaýynsha, halyq sany boıynsha kórsetkishimiz mynadaı. 18 mln.-ǵa jýyq halqymyzdyń 8,3 mln.-y el basyna kún týǵan jaǵdaıda sapqa turýǵa daıyn. Budan bólek, reıtıng boıynsha Qazaqstan armııasynyń bıýdjeti 2,4 mlrd. dollardy quraǵan. Tizim jasaýshylar málimdegendeı, bizdiń el táýligine 1,6 mln. barrel munaı óndiredi.
Atalǵan reıtıngte kósh basynda AQSh tur. Ol elde dál qazirgi tańda urys jaǵdaıyna daıyn 145 mln.-nan astam adam bar eken. Ekinshi orynda kele jatqan Reseıde bul kórsetkish 69 mln.-ǵa teń. Úzdik úshtikti Qytaı túıindegen (749 mln. adam). Sondaı-aq, alǵashqy ondyqtyń ishinde Úndistan, Ulybrıtanııa, Fransııa, Germanııa, Túrkııa, Ońtústik Koreıa jáne Japonııa bar. Eń sońǵy oryndardy Mozambık, Somalı jáne Malı syndy Afrıka memleketteri alǵan.
Aıta keteıik, Qazaqstan armııasy jýyrda taǵy bir joıǵysh ushaq túrimen tolyqty. Naqty aıtsaq, az ýaqyt buryn Taldyqorǵandaǵy avıasııalyq bazaǵa 4++ sanatyndaǵy Sý-30SM joǵary manevrli joıǵysh ushaqtar ákelindi. Bul áskerı tehnıkalar 7 mamyrda Otan qorǵaýshylar kúni jáne Jeńistiń 70 jyldyǵyna oraı Astanada uıymdastyrylǵan paradqa qatysty.
Elaman Qońyr.
Derek: tengrinews.kz.
Sýret: Erlan Omarov.
