Foto: Aqorda
Prezıdent ǵylymǵa bólingen qarjy birneshe ese artqanyn atap ótti.
«Memleket sońǵy alty jylda ǵylymǵa arnalǵan qarjyny birneshe ese ulǵaıtty. Jyl saıyn ǵylymǵa 200 mıllıard teńgeden astam, tipti, budan da kóp, 500 mıllıon dollardan asa qarjy bólinedi. Bul – Qazaqstan úshin qomaqty aqsha. Alaıda ǵylymdy qarjylandyrýdyń naqty nátıjesin ázirge kóre almaı otyrmyz. Bas prokýratýra salalyq mınıstrlikte jáne Ǵylym qorynda kóptegen ári aýqymdy qarjylyq zańbuzýshylyqtarǵa jol berilgenin áshkereledi. Nelikten osylaı bolǵanyn tap basyp aıtý qıyn. Grant alýshylardy akkredıtteýden bastap qarjylandyrý úderisiniń barlyq kezeńinde kemshilikter kózge kórinip tur. Meniń túsinigimde, ǵylym men jemqorlyq bir birine kereǵar qubylys, ekeýi qatar atalmaýǵa tıis. Memleket qarjysyn jymqyrǵysy keletin kez kelgen áreketke tosqaýyl qoıatyn súzgi ne kedergi joq», dedi Memleket basshysy.
Toqaev: Ǵylymı ázirlemelerden aýyz toltyryp aıtarlyq ekonomıkalyq áser ázirge joq
Qasym-Jomart Toqaevtyń aıtýynsha, ǵylymı úderisti damytý tujyrymdamasy qalyptaspaǵan.
«Ǵylymı úderisti damytýdyń tujyrymdy kózqarasy qalyptaspaǵan. «Áıteýir qarajatty qalaıda ıgersek boldy» degen ustanym tamyr jaıǵan. Ǵylymı jumystyń naqty paıdasy, jańashyldyǵy qandaı? Oǵan eshkim bas qatyrmaıdy. Buǵan qosa, saraptama uzaqqa sozylady. Jobalar ýaqtyly iske aspaıdy. Úkimet atalǵan máselelerdi egjeı-tegjeıli tekserip, jaǵdaıdy túzeý úshin shuǵyl sharalar qabyldaýy qajet», dedi Prezıdent.
Prezıdent: Sıfrlandyrý men jasandy ıntellektiniń damýyna basa mán berýimiz kerek
