Ǵylymı ataýy Varanus salvadorii dep atalatyn kesirtke keı elderde artellııa, kabaragoııa nemese «qoltyraýyn kesirtkesi» degen ataýmen belgili. Uzyn ári qýatty quıryǵy, denesin qaptaǵan iri qabyrshaqty terisi jáne bas pishini qoltyraýynǵa uqsas bolǵandyqtan, kópshilik arasynda dál osylaı atalyp ketken.
Jýyrda Almatyǵa Indonezııadan jasy onnan asqan eki kesirtke jetkizilgen. Qazir olar jańa ortaǵa beıimdelip, arnaıy daıyndalǵan mekeninde erkin qozǵalyp júr. Mamandardyń aıtýynsha, janýarlardyń jaǵdaıy jaqsy, tábeti de qalypty.
«Baýyrymen jorǵalaýshylar zoobaǵymyzda ózderin jaqsy sezinedi. Olar tabıǵı meken etý ortasyna barynsha uqsatyp jabdyqtalǵan terrarıýmdy zerttep júr. Munda joǵary temperatýra men ylǵaldylyq saqtalady. Kesirtkeler bul jerde ósip-ónip, uzaq ári belsendi ómir súredi dep senemiz», deıdi «Ekzotarıým» bóliminiń jetekshisi, gerpetolog Aleksandr Gýrnev.
Mamandardyń aıtýynsha, Salvador kesirtkesi – aǵashqa jaqsy órmeleıtin, óte shıraq ári zerek jyrtqyshtardyń biri. Tabıǵatta olar usaq janýarlarmen, qustarmen, jumyrtqamen qorektenedi. Bul janýarlardyń taǵy bir qyzyq qasıeti – aıyr tiliniń kómegimen aınalasyndaǵy ıisterdi «sezip», jemin dál taba bilýi.
Almaty zoobaǵyna kelýshiler bul baýyrymen jorǵalaýshylardy «Ekzotarıým» bóliminen kóre alady. Munda ekzotıkalyq janýarlar úshin barynsha jaǵdaı jasalǵan. Jańa turǵyndardyń kelýi zoobaqtaǵy baýyrymen jorǵalaýshylar kolleksııasyn tolyqtyryp qana qoımaı, kelýshilerge sırek kezdesetin janýarlar álemin jaqynnan tanýǵa múmkindik bermek.
ALMATY
