«Taýtan», «shónjik», «sarymaq» dep babalarymyz ádemi ataýlar bergen súıkimdi shónjikter alǵashqy aptalarda enesimen birge tursa, kúnniń kózi jylyǵannan keıin erkindikke shyǵyp, jańa ortaǵa, kópshilikke úırene bastaǵany baıqalady. Taýtandar enesin emip júrgenimen, qatty azyqtarǵa qyzyǵýshylyq tanytyp, kún ótken saıyn shırap keledi.
Eń qyzyǵy, Naýryz meıramy qarsańynda Almaty haıýanattar baǵy otandastarymyzdan Amýr jolbarystarynyń súıkimdi sarymaqtaryna ádemi at qoıýdy suraǵan edi. El mundaı ádemi usynysqa birden eleń etip, erkek taýtandarǵa túrli-túrli esimder usynylsa, aqyry olarǵa eń jıi atalǵan Arlan, Tarlan, Alan ataýlary buıyrdy. Shónjikterdi «Brıýs, Djekı, Chak», «Leo, Stıch pen Sımba», «Mosart, Bah, Bethoven», «Sherhan, «Dastan, Temirlan», «Mars, Merkýrıı, Iýpıter» dep ataǵysy kelgender de kóp boldy.
«Mereke kúnderi zoobaqqa 40 myńǵa jýyq qonaq keldi. Bul ótken jyldyń osy kezeńimen salystyrǵanda 23%-dan astamǵa artyq. Qala turǵyndary men qonaqtarynyń tabıǵatqa degen qyzyǵýshylyǵy óskenin baıqap otyrmyz. Amýr jolbarystarynyń kúshikteýi mańyzdy oqıǵa ǵana emes, mamandarymyzdyń qajyrly eńbeginiń nátıjesi», deıdi zoobaq dırektory Seıilhan Ákilbekov.
Qazir zoobaqta ınfraqurylymdy damytý, janýarlardy kútip-baǵýǵa qolaıly jaǵdaı jasaý jumysy jalǵasyn taýyp jatyr. Sonymen qatar kelýshilerge arnalǵan tanymdyq baǵdarlamalardyń da aýqymy ulǵaıdy.
ALMATY
