Infografıkany jasaǵan – Záýresh SMAǴUL, «EQ»
Oblys ákiminiń áleýmettik salaǵa jaýapty orynbasary Júsip Jumaǵulov usynǵan derekterge júginsek, ótken jyly óńirdiń mektepke deıingi mekemelerinde qosymsha 355 oryn ashyldy. Bul belgilengen jospardan 18,3%-ǵa artyq. Sonyń arqasynda 2–6 jas aralyǵyndaǵy búldirshinderdiń 97,5%-y mektepke deıingi tárbıemen qamtyldy.
Byltyr Petropavl qalasynda «Qazaqstan halqyna» qorynyń qoldaýymen 280 orynǵa shaqtalǵan balabaqshanyń qurylysy bastaldy. Bul sábılerdi mektepke deıingi mekememen qamtý kórsetkishin taǵy bir paıyzǵa arttyrýǵa múmkindik beredi. Sonymen qatar qarjylandyrýdyń vaýcherlik júıesi engizildi. Qarajatty barynsha tıimdi jumsaýǵa jol ashqan júıeniń kómegimen 629,1 mln teńge únemdelip, qarjy mektepterdiń materıaldyq-tehnıkalyq bazasyn nyǵaıtýǵa baǵyttaldy. Nátıjesinde, memleket qarjysyn jymqyrýǵa tosqaýyl qoıyldy. Bıyl bul tájirıbe oblystyń barlyq aýdanyna taratylmaqshy.
Budan bólek, «Keleshek mektebi» ulttyq jobasy sátti iske asyrylyp, oblys ortalyǵyndaǵy «Bereke» shaǵyn aýdanynda 600 oryndyq jańa mektep paıdalanýǵa berildi. Salynǵan bilim ordalarynyń qatarynda Esil aýdanyndaǵy Eńbek aýylynda jekemenshik qarajat esebinen boı kótergen 50 oryndyq mektep te bar. О́tken jyly mektepterdi jóndeý, jańǵyrtý jumystaryna 5,9 mlrd teńge bólinip, aýyldyq jerlerdegi 11 mekteptiń materıaldyq-tehnıkalyq bazasy 2,3 mlrd teńgege satyp alynǵan qural-jabdyqtarmen tolyqtyryldy. Sondaı-aq 291,1 mln teńgege 35 pán kabıneti jaraqtandyryldy. «Aýyl mektebi – sapa alańy» baǵdarlamasy aıasynda «Qazaqstan halqyna» qorynyń demeýshiligimen 80 STEM-kabınet ashyldy.
Áleýmettik salanyń kúretamyry sanalatyn negizgi baǵyttardyń biri – jastar saıasaty. Qazir 14–35 jas aralyǵyndaǵy azamattar óńir halqynyń 24,5%-yn qurap otyr. Oblysta 128 myńnan astam jas bar. Byltyr 100,9 mln teńgege jastar arasynda 19 joba iske asyryldy. Onyń ishinde qoǵamǵa da, jastardyń ózine de eń zor paıdasyn tıgizgeni – «Jasyl el» baǵdarlamasy. Osy baǵdarlama aıasynda 759 jas azamat jumyspen qamtyldy. Bıyl bul kórsetkishti 760-qa deıin arttyrý kózdelip otyr.
Jas mamandardy qoldaý maqsatynda «Qyzyljar jastary» atty áleýmettik ıpotekalyq baǵdarlamasy qolǵa alyndy. Jobany qarjylandyrýǵa jergilikti bıýdjetten 350 mln teńge, «Otbasy bankinen» qosymsha 350 mln teńge qarastyryldy. Sonyń arqasynda 45 jas maman jeńildetilgen shartpen turǵyn úıge qol jetkizdi. Bul baǵdarlama 2029 jylǵa deıin jalǵasyn tabady. Jastarmen jumys barysynda azamattardyń óz quqyqtary men bostandyqtaryn jete bilýine, ony qorǵaý mádenıetin arttyrýǵa baǵyttalǵan «Zań men tártip» tujyrymdamasyn dáripteý isi de belsendi júrgizilip keledi.
«Taza Qazaqstan» jalpyulttyq bastamasy aıasynda byltyr 25 myń adamdy qamtyǵan 4 myńnan astam is-shara uıymdastyryldy. Búginde jastardyń qorshaǵan ortaǵa janashyrlyqpen qarap, qoǵamdyq oryndarda tazalyq saqtaý mádenıeti qalyptasyp keledi.
Bıyl taǵy jastarǵa arnalǵan 34 jobany iske asyrý josparlanyp otyr, oǵan bıýdjetten 145,6 mln teńge bólingen. Bul bastamalardyń barlyǵy óskeleń urpaqty qoǵamdyq paıdaly eńbekke tartýdyń tıimdi tetikterin qamtıdy.
Jastardy buqaralyq sportqa baýlý – memlekettik saıasattyń basym baǵyty. Byltyr sportpen shuǵyldanatyndar qatary 228 myńǵa jýyqtady, bul burnaǵy jylmen salystyrǵanda 5 myń adamǵa artyq. Bıyl taǵy 2,8 myńdaı turǵyndy sporttyq sharalarǵa qatystyrý kózdelgen.
Oblystyń sporttyq ınfraqurylymynda 2 197 nysan tirkelgen. Onyń ishinde byltyr 43 nysan jańadan paıdalanýǵa berildi. Qurylysy júrip jatqan 46 nysan aldaǵy ýaqytta iske qosylady. Sonymen qatar «Samuryq-Qazyna» AQ men «Qazaqstan halqyna» qory birlesip, erekshe qajettiligi bar jandarǵa arnalǵan ınklıýzıvti sport ortalyǵyn salyp berýdi qolǵa almaqshy.
Sport salasyna laıyqty deńgeıde kóńil bólinýiniń nátıjesinde óńirdiń 434 sportshysy ulttyq qurama sapyna qabyldandy. Olar túrli sport túrinen 1 140 medal qanjyǵalady. Solardyń qatarynda bıylǵy qysqy paralımpıadanyń chempıony Erbol Hamıtov pen boksshy Natalıa Bogdanovanyń álemdik deńgeıde top jaryp, el namysyn abyroımen qorǵaǵanyn maqtanyshpen atap ótýge bolady.
Soltústik Qazaqstan oblysy
