Foto: Polisia.kz
Polıseıler Salyq Zımanov kóshesinde jol qozǵalysy erejelerin óreskel buzyp, qaýipti jarys uıymdastyryp apattyq jaǵdaı týǵyzǵan júrgizýshilerdi anyqtady. Olardyń áreketi ózge júrgizýshiler men jaıaý júrginshilerdiń ómirine aıtarlyqtaı qaýip tóndirgen.
Quqyq buzýshylardyń qatarynda Skoda avtokóliginiń 18 jastaǵy júrgizýshisi, sondaı-aq Toyota Highlander kóligin basqarǵan eki adam bolǵan. Olardyń biri – kámeletke tolmaǵan jasóspirim, ekinshisi – 33 jastaǵy azamat.
Barlyq qatysýshylarǵa ákimshilik hattamalar toltyryldy. Sonymen qatar, kámeletke tolmaǵan jasóspirimniń zańdy ókili de jaýapkershilikke tartyldy. Ol kólik quralyn basqarý quqyǵy joq tulǵaǵa bergeni, balany tárbıeleý mindetterin tıisinshe oryndamaǵany jáne jasóspirimniń eresekterdiń qaraýynsyz júrgeni úshin jaýap berdi.
Tártip saqshylarynyń málimetinshe, barlyq quqyq buzýshynyń kólikteri kommýnaldyq turaqqa qoıyldy.
Mınıstrlik: Úsh kúnde 40 myńnan astam jol erejesin buzý deregi tirkeldi
Jalpy, jyl basynan beri elordada apattyq jaǵdaı týǵyzǵany úshin shamamen 1800 júrgizýshi, al manevr jasaý erejelerin buzǵany úshin 3000-ǵa jýyq júrgizýshi jaýapqa tartylǵan.
Polısııa ókilderi jol qozǵalysy erejelerin óreskel buzýdyń aldyn alý baǵytynda júıeli jumys jalǵasyp jatqanyn atap ótti. Ásirese, qaýipti júrgizý, zańsyz kóshe jarystary jáne azamattardyń ómiri men densaýlyǵyna qaýip tóndiretin áreketter erekshe baqylaýda tur.
